waqt ka sans bhi tufan ka Thahraw lage

vaqt kā saañs bhī tūfān kā Thahrāv lage

is kaḌī rut meñ kahāñ TuuTī huī naav lage

har nafas ruuh meñ ik zahr-bharā ghaav lage

har sadā chīḳhte alfāz kā pathrāv lage

ḳhema-zan hogī usī jā pe savārī gul kī

ai sabā dasht meñ phir ḳhuun kā chhiḌkāv lage

phir se tajdīd-e-sitam kī na.ī sūrat niklī

had se badlā huā ahbāb kā bartāv lage

log kahte haiñ vafā jins-e-girāñ-māya hai

shahr meñ le to chaleñ dekh leñ kyā bhaav lage

har adā us kī 'zafar' jū-e-ravāñ kī mānind

dil meñ jhāñkūñ to samandar kā sā phailāv lage

waqt ka sans bhi tufan ka Thahraw lage

is kaDi rut mein kahan TuTi hui naw lage

har nafas ruh mein ek zahr-bhara ghaw lage

har sada chiKHte alfaz ka pathraw lage

KHema-zan hogi usi ja pe sawari gul ki

ai saba dasht mein phir KHun ka chhiDkaw lage

phir se tajdid-e-sitam ki nai surat nikli

had se badla hua ahbab ka bartaw lage

log kahte hain wafa jins-e-giran-maya hai

shahr mein le to chalen dekh len kya bhaw lage

har ada us ki 'zafar' ju-e-rawan ki manind

dil mein jhankun to samandar ka sa phailaw lage