waqt ka sail-e-rawan sham-o-sahar hain hum log

vaqt kā sail-e-ravāñ shām-o-sahar haiñ ham log

jis kī manzil nahīñ koī vo safar haiñ ham log

ham se mil kar bhī zamāna nahīñ vāqif ham se

ahl-e-dānish ke hijābāt-e-nazar haiñ ham log

zindagī kitne añdheroñ se ibārat hai magar

zulmatoñ ke liye paiġhām-e-sahar haiñ ham log

istilāh-e-rah-o-manzil meñ na DhūñDo ham ko

rahrav-e-manzil-e-be-rāhguzar haiñ ham log

kho.e kho.e se shab-o-roz ke hañgāmoñ meñ

kis ko mālūm ki kis vaqt kidhar haiñ ham log

apnī be-nāmvarī vaj.h-e-garāñ-qadrī hai

haath lag jaa.eñ to anmol guhar haiñ ham log

ham ko samjhoge to duniyā ko samajh pāoge

hama-tan vaqt kī ḳhāmosh nazar haiñ ham log

ham se qaa.em haiñ bahāreñ chaman-e-hastī kī

lekin apne liye ik zaḳhm-e-jigar haiñ ham log

husn-e-kirdār ko aslāf ke jab dekhte haiñ

kuchh samajh meñ nahīñ aatā ki kidhar haiñ ham log

kyā yaqīn aa.e zamāne ke badal jaane kā

kal bhī the aaj bhī nashtar-ba-jigar haiñ ham log

ārzū-ḳhez ho jo vaz.a-e-kam-āmezī se

'shauq' vo raushnī-e-fikr-o-nazar haiñ ham log

waqt ka sail-e-rawan sham-o-sahar hain hum log

jis ki manzil nahin koi wo safar hain hum log

hum se mil kar bhi zamana nahin waqif hum se

ahl-e-danish ke hijabaat-e-nazar hain hum log

zindagi kitne andheron se ibarat hai magar

zulmaton ke liye paigham-e-sahar hain hum log

istilah-e-rah-o-manzil mein na DhunDo hum ko

rahraw-e-manzil-e-be-rahguzar hain hum log

khoe khoe se shab-o-roz ke hangamon mein

kis ko malum ki kis waqt kidhar hain hum log

apni be-namwari wajh-e-garan-qadri hai

hath lag jaen to anmol guhar hain hum log

hum ko samjhoge to duniya ko samajh paoge

hama-tan waqt ki KHamosh nazar hain hum log

hum se qaem hain bahaaren chaman-e-hasti ki

lekin apne liye ek zaKHm-e-jigar hain hum log

husn-e-kirdar ko aslaf ke jab dekhte hain

kuchh samajh mein nahin aata ki kidhar hain hum log

kya yaqin aae zamane ke badal jaane ka

kal bhi the aaj bhi nashtar-ba-jigar hain hum log

aarzu-KHez ho jo waza-e-kam-amezi se

'shauq' wo raushni-e-fikr-o-nazar hain hum log