waqt ke aazar bata ye saneha kyunkar hua

vaqt ke aazar batā ye sāneha kyūñkar huā

ham ne jis ko ḳhud banāyā vo ḳhudā kyūñkar huā

shor hai har samt aur ik bhiiḌ hai chāroñ taraf

pūchhte ho phir bhī vo ham se judā kyūñkar huā

kartā thā da.avā ḳhudā.ī kā usī se pūchh lo

darmiyān-e-āb-o-ātish rāsta kyūñkar huā

vo nayā kah kar jise dohrā rahā hai baar baar

duniyā hai sadiyoñ se vāqif phir nayā kyūñkar huā

muddatoñ se thā sharīk-e-ġham to phir ai dosto

aaj us ko kyā huā ham se judā kyūñkar huā

aql hairāñ ho rahī hai ishq kī parvāz par

ek pal meñ tai ye āḳhir marhala kyūñkar huā

us kī haisiyyat hai kul kī aur ham sab us ke juzv

vo samundar hai to fitrat se judā kyūñkar huā

taaj tere sar kā jo be-sar huā thā ai 'jamīl'

maiñ huuñ terī ḳhāk-e-pā mujh ko atā kyūñkar huā

rahbaroñ kī rahnumā.ī meñ chale 'mansūr' ham

qāfila phir bhī luTā ye hādisa kyūñkar huā

waqt ke aazar bata ye saneha kyunkar hua

hum ne jis ko KHud banaya wo KHuda kyunkar hua

shor hai har samt aur ek bhiD hai chaaron taraf

puchhte ho phir bhi wo hum se juda kyunkar hua

karta tha dawa KHudai ka usi se puchh lo

darmiyan-e-ab-o-atish rasta kyunkar hua

wo naya kah kar jise dohra raha hai bar bar

duniya hai sadiyon se waqif phir naya kyunkar hua

muddaton se tha sharik-e-gham to phir ai dosto

aaj us ko kya hua hum se juda kyunkar hua

aql hairan ho rahi hai ishq ki parwaz par

ek pal mein tai ye aaKHir marhala kyunkar hua

us ki haisiyyat hai kul ki aur hum sab us ke juzw

wo samundar hai to fitrat se juda kyunkar hua

taj tere sar ka jo be-sar hua tha ai 'jamil'

main hun teri KHak-e-pa mujh ko ata kyunkar hua

rahbaron ki rahnumai mein chale 'mansur' hum

qafila phir bhi luTa ye hadisa kyunkar hua