waqt ke be-Dhab raston par aur ulTi sidhi chaal mein KHush

vaqt ke be-Dhab rastoñ par aur ulTī sīdhī chaal meñ ḳhush

dekho kaise rahte haiñ ham duniyā ke janjāl meñ ḳhush

jaane vaalā saal to phir bhī jaise-taise biit gayā

is duniyā ko rakhnā maulā aane vaale saal meñ ḳhush

ik manzar kī shādābī ne yuuñ ham ko ḳhush-rang kiyā

mausam mausam phirte haiñ aur rahte haiñ har haal meñ ḳhush

marg-e-mohabbat aur is ke asbāb pe āḳhir ro.e kaun

vo bhī ḳhud meñ mast magan hai maiñ bhī apne haal meñ ḳhush

tum māñge kā resham pahno aish karo haañ lekin ham

ḳhud-dārī kī phaTī-purānī ek akelī shaal meñ ḳhush

ik bachche kī aañkh meñ jaise raushan ho ma.asūm ḳhushī

bilkul aise hote haiñ ham aap ke istiqbāl meñ ḳhush

waqt ke be-Dhab raston par aur ulTi sidhi chaal mein KHush

dekho kaise rahte hain hum duniya ke janjal mein KHush

jaane wala sal to phir bhi jaise-taise bit gaya

is duniya ko rakhna maula aane wale sal mein KHush

ek manzar ki shadabi ne yun hum ko KHush-rang kiya

mausam mausam phirte hain aur rahte hain har haal mein KHush

marg-e-mohabbat aur is ke asbab pe aaKHir roe kaun

wo bhi KHud mein mast magan hai main bhi apne haal mein KHush

tum mange ka resham pahno aish karo han lekin hum

KHud-dari ki phaTi-purani ek akeli shaal mein KHush

ek bachche ki aankh mein jaise raushan ho masum KHushi

bilkul aise hote hain hum aap ke istiqbaal mein KHush