waqt ke chehre pe chaDhti dhup ka ghaza laga

vaqt ke chehre pe chaḌhtī dhuup kā ġhāza lagā

kuchh mire rañg-e-suḳhan kā is se andāza lagā

ek lafz-e-kun amīn-e-ālam-e-imkāñ hazār

ek ik lamhe se to sadiyoñ kā andāza lagā

TuuT jaatā huuñ shikasta aa.ine ko dekh kar

jab kabhī ḳhud se milā huuñ zaḳhm ik taaza lagā

ik na ik aaseb chupke se abhī dar aa.egā

band kar ghar ke darīche laakh darvāza lagā

sochtā kyā hai muqaddar āzmānā shart hai

khul hī jā.egā darīcha koī āvāza lagā

chilchilātī dhuup kī nazroñ ne taakā hai vahīñ

sabz Tahnī par agar ik phuul bhī taaza lagā

ijz ejāz-e-suḳhan hai ma.anī-e-ījād-e-fan

qīmat-e-arz-e-hunar kā kuchh to andāza lagā

waqt ke chehre pe chaDhti dhup ka ghaza laga

kuchh mere rang-e-suKHan ka is se andaza laga

ek lafz-e-kun amin-e-alam-e-imkan hazar

ek ek lamhe se to sadiyon ka andaza laga

TuT jata hun shikasta aaine ko dekh kar

jab kabhi KHud se mila hun zaKHm ek taza laga

ek na ek aaseb chupke se abhi dar aaega

band kar ghar ke dariche lakh darwaza laga

sochta kya hai muqaddar aazmana shart hai

khul hi jaega daricha koi aawaza laga

chilchilati dhup ki nazron ne taka hai wahin

sabz Tahni par agar ek phul bhi taza laga

ijz ejaz-e-suKHan hai mani-e-ijad-e-fan

qimat-e-arz-e-hunar ka kuchh to andaza laga