waqt ke chehre pe ek gahri nazar rakhta tha wo

vaqt ke chehre pe ik gahrī nazar rakhtā thā vo

thā to dīvāna magar sab kī ḳhabar rakhtā thā vo

us kī himmat ḳhud thī us ke 'azm kī ā.īna-dār

saath meñ apne sadā gard-e-safar rakhtā thā vo

mujh ko us ke jhuuT ko sach maan lenā hī paḌā

guftugū meñ apnī is darja asar rakhtā thā vo

qaid thā muTThī meñ us kī māh-o-aḳhtar kā jahāñ

dastaras apnī ‘urūj-e-‘arsh par rakhtā thā vo

vaqt-e-āḳhir jo paḌā thā shahr ke fōtpath par

log to kahte the apne paas ghar rakhtā thā vo

khodtā rahtā thā aksar jis se fikroñ ke pahāḌ

paas aisā tesha-e-'ilm-o-hunar rakhtā thā vo

phīke paḌ jaate the us ke qahqahoñ se dard-o-ġham

apne siine meñ 'zakī' aisā jigar rakhtā thā vo

waqt ke chehre pe ek gahri nazar rakhta tha wo

tha to diwana magar sab ki KHabar rakhta tha wo

us ki himmat KHud thi us ke 'azm ki aaina-dar

sath mein apne sada gard-e-safar rakhta tha wo

mujh ko us ke jhuT ko sach man lena hi paDa

guftugu mein apni is darja asar rakhta tha wo

qaid tha muTThi mein us ki mah-o-aKHtar ka jahan

dastaras apni ‘uruj-e-‘arsh par rakhta tha wo

waqt-e-aKHir jo paDa tha shahr ke footpath par

log to kahte the apne pas ghar rakhta tha wo

khodta rahta tha aksar jis se fikron ke pahaD

pas aisa tesha-e-'ilm-o-hunar rakhta tha wo

phike paD jate the us ke qahqahon se dard-o-gham

apne sine mein 'zaki' aisa jigar rakhta tha wo