waqt ke hathon majbur hote gae

vaqt ke hāthoñ majbūr hote ga.e

tum kisī se bahut duur hote ga.e

dhuul qadmoñ kī chehre pe kyā mal liyā

aur bhī ham to pur-nūr hote ga.e

is tarah ham ne un ko nakārā ki phir

vo hameñ aur manzūr hote ga.e

jaane kyā chiiz paas un ke aatī rahī

un kī nazroñ se ham duur hote ga.e

merī ġhazloñ meñ naam un kā aatā rahā

dhīre dhīre vo mash.hūr hote rahe

merī yādeñ havā ban ke uḌtī rahīñ

saare qisse bhī kāfūr hote ga.e

un kī yādoñ ne bīmār mujh ko kiyā

aur idhar vo bhī bharpūr hote ga.e

duur rakkhā bahakne se mujh ko magar

aur nashshe meñ ḳhud chuur hote ga.e

jin ko samjhā thā ma.amūlī haiñ zaḳhm ye

'anjanā' vo to nāsūr hote ga.e

waqt ke hathon majbur hote gae

tum kisi se bahut dur hote gae

dhul qadmon ki chehre pe kya mal liya

aur bhi hum to pur-nur hote gae

is tarah hum ne un ko nakara ki phir

wo hamein aur manzur hote gae

jaane kya chiz pas un ke aati rahi

un ki nazron se hum dur hote gae

meri ghazlon mein nam un ka aata raha

dhire dhire wo mashhur hote rahe

meri yaaden hawa ban ke uDti rahin

sare qisse bhi kafur hote gae

un ki yaadon ne bimar mujh ko kiya

aur idhar wo bhi bharpur hote gae

dur rakkha bahakne se mujh ko magar

aur nashshe mein KHud chur hote gae

jin ko samjha tha mamuli hain zaKHm ye

'anjana' wo to nasur hote gae