waqt ke intizar mein wo hai

vaqt ke intizār meñ vo hai

justujū-e-shikār meñ vo hai

sīna-e-rāzdār hī meñ nahīñ

dīda-e-āshkār meñ vo hai

ā.īna saaf ho to dekh use

naqsha-e-dil-figār meñ vo hai

us ke qabze meñ kā.enāt sahī

fuqarā kī qatār meñ vo hai

sar pe dastār-e-fazl hai lekin

jubba-e-tār-tār meñ vo hai

be-karāñ zehn o dil kī hai vus.at

jism-o-jāñ ke hisār meñ vo hai

us kī chāroñ taraf kitābeñ haiñ

halqa-e-ġham-gusār meñ vo hai

pesh-e-zālim sadā-e-haq yaanī

narġha-e-sad-hazār meñ vo hai

qila-e-be-basar meñ tum mahfūz

ḳhud-kalāmī ke ġhaar meñ vo hai

ḳhaak tum pā sakoge ḳhaak use

aab o baad o sharār meñ vo hai

lamha-hā-e-sukūñ meñ us kī talāsh

sā.at-e-iztirār meñ vo hai

pairvī us kī hai abas 'rāhī'

ḳhud hī rāh-e-farār meñ vo hai

waqt ke intizar mein wo hai

justuju-e-shikar mein wo hai

sina-e-raazdar hi mein nahin

dida-e-ashkar mein wo hai

aaina saf ho to dekh use

naqsha-e-dil-figar mein wo hai

us ke qabze mein kaenat sahi

fuqara ki qatar mein wo hai

sar pe dastar-e-fazl hai lekin

jubba-e-tar-tar mein wo hai

be-karan zehn o dil ki hai wusat

jism-o-jaan ke hisar mein wo hai

us ki chaaron taraf kitaben hain

halqa-e-gham-gusar mein wo hai

pesh-e-zalim sada-e-haq yani

nargha-e-sad-hazar mein wo hai

qila-e-be-basar mein tum mahfuz

KHud-kalami ke ghaar mein wo hai

KHak tum pa sakoge KHak use

aab o baad o sharar mein wo hai

lamha-ha-e-sukun mein us ki talash

saat-e-iztirar mein wo hai

pairwi us ki hai abas 'rahi'

KHud hi rah-e-farar mein wo hai