waqt ke sath wo samjha tha badal jaunga

vaqt ke saath vo samjhā thā badal jā.ūñgā

hijr kī aag meñ lagtā hai ki jal jā.ūñgā

tū mire hāl-e-shikasta se pareshān na ho

thoḌā tanhā.ī meñ ro lūñgā sañbhal jā.ūñgā

maiñ tire ishq kī dīvār kā kachchā rang huuñ

tez bārish na sahūñgā maiñ nikal jā.ūñgā

rāt-bhar jalne jalāne kī sazā de mujh ko

yā ki sūraj tū banā de mujhe Dhal jā.ūñgā

maiñ huuñ ik aa.ina par gard jamī hai mujh par

terī sohbat meñ rahūñgā to ujal jā.ūñgā

maiñ ne āñkhoñ meñ chhupā.e haiñ tirī yaad ke ġham

tū mire sāmne aaya to machal jā.ūñgā

waqt ke sath wo samjha tha badal jaunga

hijr ki aag mein lagta hai ki jal jaunga

tu mere haal-e-shikasta se pareshan na ho

thoDa tanhai mein ro lunga sanbhal jaunga

main tere ishq ki diwar ka kachcha rang hun

tez barish na sahunga main nikal jaunga

raat-bhar jalne jalane ki saza de mujh ko

ya ki suraj tu bana de mujhe Dhal jaunga

main hun ek aaina par gard jami hai mujh par

teri sohbat mein rahunga to ujal jaunga

main ne aankhon mein chhupae hain teri yaad ke gham

tu mere samne aaya to machal jaunga