waqt ki gardish-e-saffak se Dar lagta hai

vaqt kī gardish-e-saffāk se Dar lagtā hai

kūza-gar mujh ko tire chaak se Dar lagtā hai

ye jalā de na kahīñ mere hī ghar āñgan ko

mujh ko apne ḳhas-o-ḳhāshāk se Dar lagtā hai

sochtā huuñ maiñ akelā na kahīñ ho jā.ūñ

mujh ko ab ḳhud bhī mirī dhaak se Dar lagtā hai

sāda-lauhī meñ ka.ī baar luTe haiñ ham log

ab tirī fitrat-e-chālāk se Dar lagtā hai

kisī tūfān ko ḳhātir meñ nahīñ laatā maiñ

bas tire dīda-e-namnāk se Dar lagtā hai

mudda'ā dil kā to maiñ kab kā bayāñ kar detā

par tirī chashm-e-ġhazabnāk se Dar lagtā hai

waqt ki gardish-e-saffak se Dar lagta hai

kuza-gar mujh ko tere chaak se Dar lagta hai

ye jala de na kahin mere hi ghar aangan ko

mujh ko apne KHas-o-KHashak se Dar lagta hai

sochta hun main akela na kahin ho jaun

mujh ko ab KHud bhi meri dhak se Dar lagta hai

sada-lauhi mein kai bar luTe hain hum log

ab teri fitrat-e-chaalak se Dar lagta hai

kisi tufan ko KHatir mein nahin lata main

bas tere dida-e-namnak se Dar lagta hai

mudda'a dil ka to main kab ka bayan kar deta

par teri chashm-e-ghazabnak se Dar lagta hai