waqt ki kaisi hai raftar tumhein kya malum

vaqt kī kaisī hai raftār tumheñ kyā mā'lūm

kab ye ban jā.egā hathiyār tumheñ kyā mā'lūm

jang patthar se ho laḌnā to baḌī baat nahīñ

phuul se laḌnā hai dushvār tumheñ kyā mā'lūm

Thiik se dekh nahīñ paa.ī hai mā'nī apne

lafz kī aañkh hai bīmār tumheñ kyā mā'lūm

tum charāġh apne jalāne ko ho betāb magar

raushnī hogī giraftār tumheñ kyā mā'lūm

pūchhte ho mujhe tum pyaar kī tāqat kyā hai

chhīn letī hai ye talvār tumheñ kyā mā'lūm

tum ne har phuul ko kuchlā baḌī bedardī se

kaise sīñchā gayā gulzār tumheñ kyā mā'lūm

maanā insān nahīñ tanz se martā 'ātif'

dil to ho jaatā hai mismār tumheñ kyā mā'lūm

waqt ki kaisi hai raftar tumhein kya ma'lum

kab ye ban jaega hathiyar tumhein kya ma'lum

jang patthar se ho laDna to baDi baat nahin

phul se laDna hai dushwar tumhein kya ma'lum

Thik se dekh nahin pai hai ma'ni apne

lafz ki aankh hai bimar tumhein kya ma'lum

tum charagh apne jalane ko ho betab magar

raushni hogi giraftar tumhein kya ma'lum

puchhte ho mujhe tum pyar ki taqat kya hai

chhin leti hai ye talwar tumhein kya ma'lum

tum ne har phul ko kuchla baDi bedardi se

kaise sincha gaya gulzar tumhein kya ma'lum

mana insan nahin tanz se marta 'atif'

dil to ho jata hai mismar tumhein kya ma'lum