waqt ki tez rawi dekh ke Dar jate hain

vaqt kī tez ravī dekh ke Dar jaate haiñ

log jiite haiñ kuchh is tarah ki mar jaate haiñ

zindagānī tirī azmat ko baḌhāne vaale

muskurāte hue maqtal se guzar jaate haiñ

bazm yārāñ ho ki dasht-e-shab-e-tanhā.ī ho

zaḳhm bharne pe jab aate haiñ to bhar jaate haiñ

ye shab-o-roz bhī aurāq-e-pareshāñ kī tarah

bārhā vaqt kī āñdhī meñ bikhar jaate haiñ

kitnī yādoñ se ulajhtī hai mirī tanhā.ī

kitne tūfān mire sar se guzar jaate haiñ

duur rah kar bhī kabhī shikva-e-dūrī na rahā

aap hī aap haiñ jis samt jidhar jaate haiñ

apnī palkoñ pe sajā.e hue ashkoñ ke charāġh

kuchh to kahiye ki 'ra.īs' aap kidhar jaate haiñ

waqt ki tez rawi dekh ke Dar jate hain

log jite hain kuchh is tarah ki mar jate hain

zindagani teri azmat ko baDhane wale

muskuraate hue maqtal se guzar jate hain

bazm yaran ho ki dasht-e-shab-e-tanhai ho

zaKHm bharne pe jab aate hain to bhar jate hain

ye shab-o-roz bhi auraq-e-pareshan ki tarah

barha waqt ki aandhi mein bikhar jate hain

kitni yaadon se ulajhti hai meri tanhai

kitne tufan mere sar se guzar jate hain

dur rah kar bhi kabhi shikwa-e-duri na raha

aap hi aap hain jis samt jidhar jate hain

apni palkon pe sajae hue ashkon ke charagh

kuchh to kahiye ki 'rais' aap kidhar jate hain