waqt ne dil ki tabiat mein wafa rakkhi hai

vaqt ne dil kī tabī.at meñ vafā rakkhī hai

kulfat-e-āgahī phir us kī sazā rakhī hai

dil ho pazhmurda to hai ḳhanda-e-gul be-ma.anī

har ḳhushī aur ġhamī dil ne chhupā rakkhī hai

chaak kartī hai sabā sub.h ko ġhunchoñ ke jigar

ye kahānī mujhe shabnam ne sunā rakkhī hai

ġhunche ġhunche meñ hai poshīda salīb-e-ġham-e-dost

kis ne phūloñ meñ ye qātil kī adā rakkhī hai

kis ke chhup jaane se hairān huī hai duniyā

kis ke jalvoñ ne ye dīvānī banā rakkhī hai

zindagī ho ga.ī kis tarah tū itnī sastī

kis liye tū ne bharī duniyā satā rakkhī hai

ilm se jis ke mujhe mil sake manzil kā nishāñ

vaqt ne mujh se vahī baat chhupā rakkhī hai

ham ne har moḌ pe chāhat ke jalā.e haiñ charāġh

ham ne har gaam pe ulfat kī binā rakkhī hai

tafraqoñ kā nahīñ aapas meñ kahīñ koī javāz

sab ne auhām kī dīvār uThā rakkhī hai

dard-e-hijrāñ ke tasalsul se na ghabrā dil-e-zār

ishq ne dard ke andar hī davā rakkhī hai

vaqt le aayā hai ḳhud had meñ use der saver

jis ne bhī qad se sivā apnī anā rakkhī hai

us sitamgar kā meñ ai 'rāz' karūñ kyā shikva

har balā mere liye jis ne ravā rakkhī hai

waqt ne dil ki tabiat mein wafa rakkhi hai

kulfat-e-agahi phir us ki saza rakhi hai

dil ho pazhmurda to hai KHanda-e-gul be-mani

har KHushi aur ghami dil ne chhupa rakkhi hai

chaak karti hai saba subh ko ghunchon ke jigar

ye kahani mujhe shabnam ne suna rakkhi hai

ghunche ghunche mein hai poshida salib-e-gham-e-dost

kis ne phulon mein ye qatil ki ada rakkhi hai

kis ke chhup jaane se hairan hui hai duniya

kis ke jalwon ne ye diwani bana rakkhi hai

zindagi ho gai kis tarah tu itni sasti

kis liye tu ne bhari duniya sata rakkhi hai

ilm se jis ke mujhe mil sake manzil ka nishan

waqt ne mujh se wahi baat chhupa rakkhi hai

hum ne har moD pe chahat ke jalae hain charagh

hum ne har gam pe ulfat ki bina rakkhi hai

tafraqon ka nahin aapas mein kahin koi jawaz

sab ne auham ki diwar uTha rakkhi hai

dard-e-hijran ke tasalsul se na ghabra dil-e-zar

ishq ne dard ke andar hi dawa rakkhi hai

waqt le aaya hai KHud had mein use der sawer

jis ne bhi qad se siwa apni ana rakkhi hai

us sitamgar ka mein ai 'raaz' karun kya shikwa

har bala mere liye jis ne rawa rakkhi hai