waqt sochon ki masafat ka sila bhi dega

vaqt sochoñ kī masāfat kā sila bhī degā

dasht-e-imkāñ kisī manzil kā patā bhī degā

jis ne tārīk guphāoñ kā safar baḳhshā hai

vahī afkār o taḳhayyul ko ziyā bhī degā

maiñ bhalā kaun ki andesha-e-fardā meñ ghulūñ

khetiyāñ jis ne ugaa.ī haiñ ghaTā bhī degā

is tavaqqo pe qadam ho ga.e patthar shāyad

ik darīcha mujhe dhīre se sadā bhī degā

haa.e vo shaḳhs ki jī bhar ke satā.egā mujhe

aur phir chain se sone kī duā bhī degā

mujh ko jhuTlā.egā tardīd karegā merī

dost hai jurm-e-rifāqat kī sazā bhī degā

waqt sochon ki masafat ka sila bhi dega

dasht-e-imkan kisi manzil ka pata bhi dega

jis ne tarik guphaon ka safar baKHsha hai

wahi afkar o taKHayyul ko ziya bhi dega

main bhala kaun ki andesha-e-farda mein ghulun

khetiyan jis ne ugai hain ghaTa bhi dega

is tawaqqo pe qadam ho gae patthar shayad

ek daricha mujhe dhire se sada bhi dega

hae wo shaKHs ki ji bhar ke sataega mujhe

aur phir chain se sone ki dua bhi dega

mujh ko jhuTlaega tardid karega meri

dost hai jurm-e-rifaqat ki saza bhi dega