wara-e-ishq apna rup barsane kahan jate

varā-e-ishq apnā ruup barsāne kahāñ jaate

tumhārī ḳhushnumā āñkhoñ ke paimāne kahāñ jaate

harīm-e-nāz meñ jalvoñ pe pābandī bahut kuchh thī

magar ham bhī dil-e-nādāñ ko bahlāne kahāñ jaate

tamanna ne tire jalvoñ kī dīvāna banāyā thā

agar parda na uTh jaatā to dīvāne kahāñ jaate

mirā zauq-e-nazar āḳhir kisī ke kaam hī aaya

gulābī ārizoñ ke narm paimāne kahāñ jaate

nazar ke sāmne aa kar sajā dī zindagī tum ne

mohabbat meñ ye ahl-e-dil ḳhudā jaane kahāñ jaate

bahut āsāniyāñ kar diiñ nigāhoñ ke tasādum ne

unheñ ham apne dil kī baat samjhāne kahāñ jaate

abhī tak chāñdnī rātoñ meñ dil par raqs karte haiñ

tumhārī yaad ke rangīn afsāne kahāñ jaate

usī jānib se kuchh dil ko sahārā mil gayā varna

ye ahl-e-ġham shikast-e-dil ko dohrāne kahāñ jaate

nazar kī laġhzishoñ se baat dil kī khul ga.ī 'saifī'

ham us mahfil meñ itnī jald pahchāne kahāñ jaate

wara-e-ishq apna rup barsane kahan jate

tumhaari KHushnuma aankhon ke paimane kahan jate

harim-e-naz mein jalwon pe pabandi bahut kuchh thi

magar hum bhi dil-e-nadan ko bahlane kahan jate

tamanna ne tere jalwon ki diwana banaya tha

agar parda na uTh jata to diwane kahan jate

mera zauq-e-nazar aaKHir kisi ke kaam hi aaya

gulabi aarizon ke narm paimane kahan jate

nazar ke samne aa kar saja di zindagi tum ne

mohabbat mein ye ahl-e-dil KHuda jaane kahan jate

bahut aasaniyan kar din nigahon ke tasadum ne

unhen hum apne dil ki baat samjhane kahan jate

abhi tak chandni raaton mein dil par raqs karte hain

tumhaari yaad ke rangin afsane kahan jate

usi jaanib se kuchh dil ko sahaara mil gaya warna

ye ahl-e-gham shikast-e-dil ko dohrane kahan jate

nazar ki laghzishon se baat dil ki khul gai 'saifi'

hum us mahfil mein itni jald pahchane kahan jate