waraq waraq jo zamane ke shahkar mein tha

varaq varaq jo zamāne ke shāhkār meñ thā

vo zindagī kā sahīfa bhī intishār meñ thā

jise maiñ DhūñD rahā thā navā-e-bulbul meñ

vo naġhma pairahan-e-gul ke taar taar meñ thā

maiñ qatl ho ke zamāne meñ sarfarāz rahā

ki merī jiit kā pahlū bhī merī haar meñ thā

kaleje saare daraḳhtoñ ke sahme jaate the

havā kā ruḳh thā bhalā kis ke iḳhtiyār meñ thā

vo nā-shanās-vafā sej par thā phūloñ kī

maiñ āshnā-e-vafā dasht-e-ḳhār-ḳhār meñ thā

dayār-e-ġhair meñ hāsil thiiñ shohrateñ mujh ko

maiñ ajnabī kī tarah apne hī dayār meñ thā

samajh rahā thā maiñ ḳhvābīda ḳhud ko sāhil par

khulī jab aañkh to dariyā kī tez dhaar meñ thā

nigāh vāloñ meñ us kā bharam na rah paayā

vo sañg thā magar ā.īnoñ kī qatār meñ thā

mohabbateñ thiiñ mire iḳhtiyār meñ lekin

mohabbatoñ kā sila us ke iḳhtiyār meñ thā

chamak rahā vahī gauhar-e-vafā ban kar

'guhar' jo ashk mirī chashm-e-intizār meñ thā

waraq waraq jo zamane ke shahkar mein tha

wo zindagi ka sahifa bhi intishaar mein tha

jise main DhunD raha tha nawa-e-bulbul mein

wo naghma pairahan-e-gul ke tar tar mein tha

main qatl ho ke zamane mein sarfaraaz raha

ki meri jit ka pahlu bhi meri haar mein tha

kaleje sare daraKHton ke sahme jate the

hawa ka ruKH tha bhala kis ke iKHtiyar mein tha

wo na-shanas-wafa sej par tha phulon ki

main aashna-e-wafa dasht-e-KHar-KHar mein tha

dayar-e-ghair mein hasil thin shohraten mujh ko

main ajnabi ki tarah apne hi dayar mein tha

samajh raha tha main KHwabida KHud ko sahil par

khuli jab aankh to dariya ki tez dhaar mein tha

nigah walon mein us ka bharam na rah paya

wo sang tha magar aainon ki qatar mein tha

mohabbaten thin mere iKHtiyar mein lekin

mohabbaton ka sila us ke iKHtiyar mein tha

chamak raha wahi gauhar-e-wafa ban kar

'guhar' jo ashk meri chashm-e-intizar mein tha