wasile kaamrani ke husul-e-zar mein rakkhe hain

vasīle kāmrānī ke husūl-e-zar meñ rakkhe haiñ

ki sīdhe rāste bhī to kisī chakkar meñ rakkhe haiñ

mire dushman ko mujh par vaar karne kī zarūrat kyā

use ma.alūm hai kyā log is lashkar meñ rakkhe haiñ

mujhe rakkhā to rakkhā shak bharī nazroñ ke pahre meñ

jo dushman the mire yāroñ ne apne ghar meñ rakkhe haiñ

jo āñkhoñ ko nahīñ hasb-e-zarūrat dekhne dete

kuchh aise aa.ine bhī dhuup ke manzar meñ rakkhe haiñ

ka.ī asrār haiñ khulte nahīñ jo zehn-e-ādam par

ka.ī nukte haiñ jo tafhīm-e-ḳhair-o-shar meñ rakkhe haiñ

yahāñ bas ek īmāñ kī hī gunjā.ish nahīñ niklī

hazāroñ vasvase yuuñ to dil-e-kāfir meñ rakkhe haiñ

ab itnā zor se bhī chīḳhnā achchhā nahīñ lagtā

qayāmat hī sahī go arsa-e-mehshar meñ rakkhe haiñ

gavāhī kaun dene aa.egā aisī adālat meñ

kaTahre bhī jahāñ qātil ne apne ghar meñ rakkhe haiñ

aur ab sajde se uThne kī sakat bhī kis meñ baaqī hai

hamāre rizq ai ma.abūd kis patthar meñ rakkhe haiñ

hameñ 'shahzād' apne aap se hī pūchhnā hogā

jahāñ meñ ik hamī kyoñ paañv kī Thokar meñ rakkhe haiñ

wasile kaamrani ke husul-e-zar mein rakkhe hain

ki sidhe raste bhi to kisi chakkar mein rakkhe hain

mere dushman ko mujh par war karne ki zarurat kya

use malum hai kya log is lashkar mein rakkhe hain

mujhe rakkha to rakkha shak bhari nazron ke pahre mein

jo dushman the mere yaron ne apne ghar mein rakkhe hain

jo aankhon ko nahin hasb-e-zarurat dekhne dete

kuchh aise aaine bhi dhup ke manzar mein rakkhe hain

kai asrar hain khulte nahin jo zehn-e-adam par

kai nukte hain jo tafhim-e-KHair-o-shar mein rakkhe hain

yahan bas ek iman ki hi gunjaish nahin nikli

hazaron waswase yun to dil-e-kafir mein rakkhe hain

ab itna zor se bhi chiKHna achchha nahin lagta

qayamat hi sahi go arsa-e-mehshar mein rakkhe hain

gawahi kaun dene aaega aisi adalat mein

kaTahre bhi jahan qatil ne apne ghar mein rakkhe hain

aur ab sajde se uThne ki sakat bhi kis mein baqi hai

hamare rizq ai mabud kis patthar mein rakkhe hain

hamein 'shahzad' apne aap se hi puchhna hoga

jahan mein ek hami kyon panw ki Thokar mein rakkhe hain