wasl arzan waqt ki lekin farawani gai

vasl arzāñ vaqt kī lekin farāvānī ga.ī

baḌh ga.ī jitnī suhūlat utnī āsānī ga.ī

ma.asiyat kā zikr kyā hai ma.asiyat pahle bhī thī

rañj to ye hai gunāhoñ se pashemānī ga.ī

ishq bhī dil se kiyā jogī bane vahshat bhī kī

kyā huā kuchh to kaho kyā vaz-e-haivānī ga.ī

ek lambā fāsla hai jaan se pahchān tak

shakl jo jaanī ga.ī vo bhī na pahchānī ga.ī

pahle bhī sailāb aate the magar kyā is qadar

ab ke to barsāt meñ har fasl bārānī ga.ī

zer-e-lab ik lafz ne kaisā hameñ chauñkā diyā

pal hī pal meñ 'ḳhānqāhī' sab hama-dānī ga.ī

wasl arzan waqt ki lekin farawani gai

baDh gai jitni suhulat utni aasani gai

masiyat ka zikr kya hai masiyat pahle bhi thi

ranj to ye hai gunahon se pashemani gai

ishq bhi dil se kiya jogi bane wahshat bhi ki

kya hua kuchh to kaho kya waz-e-haiwani gai

ek lamba fasla hai jaan se pahchan tak

shakl jo jaani gai wo bhi na pahchani gai

pahle bhi sailab aate the magar kya is qadar

ab ke to barsat mein har fasl barani gai

zer-e-lab ek lafz ne kaisa hamein chaunka diya

pal hi pal mein 'KHanqahi' sab hama-dani gai