wasl ka aish kahan par gham-e-hijran to hai

vasl kā aish kahāñ par ġham-e-hijrāñ to hai

lab-e-ḳhandāñ to nahīñ dīda-e-giryāñ to hai

aarzū aur to kuchh ham ko nahīñ duniyā meñ

haañ magar ek tire milne kā armāñ to hai

haal kyā pūchhe hai hairat-kada-e-dahr kā dekh

aa.ina yaañ kā har ik dīda-e-hairāñ to hai

daam se ḳhat ke chhuTā dil to nahīñ ḳhātir jam.a

qaid karne ko abhī zulf-e-pareshāñ to hai

le chalā dil ko jo vo shoḳh tū hamdam na bulā

aaphī āvegā vo ham paas abhī jaañ to hai

go na ho aish kā asbāb mayassar to na ho

vāste dil ke ġham-o-dard kā sāmāñ to hai

ek hī dam meñ kiyā sar ko judā ḳhuub kiyā

teġh kā terī ye sar par mire ehsāñ to hai

go hue jaib ke TukḌe to nahīñ ġham ham ko

chaak karne ko hamārā abhī dāmāñ to hai

jo paḌe ishq kī aafat meñ vahī jaane 'hasan'

ḳhalq ke kahne meñ yuuñ āshiqī āsāñ to hai

wasl ka aish kahan par gham-e-hijran to hai

lab-e-KHandan to nahin dida-e-giryan to hai

aarzu aur to kuchh hum ko nahin duniya mein

han magar ek tere milne ka arman to hai

haal kya puchhe hai hairat-kada-e-dahr ka dekh

aaina yan ka har ek dida-e-hairan to hai

dam se KHat ke chhuTa dil to nahin KHatir jama

qaid karne ko abhi zulf-e-pareshan to hai

le chala dil ko jo wo shoKH tu hamdam na bula

aaphi aawega wo hum pas abhi jaan to hai

go na ho aish ka asbab mayassar to na ho

waste dil ke gham-o-dard ka saman to hai

ek hi dam mein kiya sar ko juda KHub kiya

tegh ka teri ye sar par mere ehsan to hai

go hue jaib ke TukDe to nahin gham hum ko

chaak karne ko hamara abhi daman to hai

jo paDe ishq ki aafat mein wahi jaane 'hasan'

KHalq ke kahne mein yun aashiqi aasan to hai