wasl ki raat hai aaKHir kabhi uryan honge

vasl kī raat hai āḳhir kabhī uryāñ hoñge

maiñ pashemāñ huuñ to kyā vo na pashemāñ hoñge

aap mar jā.ūñgā tū aa ki na aa o zālim

aaj vo din hai ki mujh par mire ehsāñ hoñge

ġhair kī shakl baneñge kabhī ḳhud un kā shauq

ham bhī dekheñ to kahāñ tak na vo pursāñ hoñge

dil jo rūThā to manāne se kahīñ mantā hai

ye sitam bā.is-e-hasrat tujhe ai jaañ hoñge

aaj bahrūp adū kā hai banāyā maiñ ne

ab to vo bhī mire andāz pe qurbāñ hoñge

un ko pahneñge mire dasht-e-junūñ ke kāñTe

ye vo dāman haiñ ki āḳhir ko garebāñ hoñge

barhamī dūrī-e-jānāñ meñ unheñ hogī 'nasīm'

mere naale asar-e-fikr-e-ġhazal-ḳhvāñ hoñge

wasl ki raat hai aaKHir kabhi uryan honge

main pasheman hun to kya wo na pasheman honge

aap mar jaunga tu aa ki na aa o zalim

aaj wo din hai ki mujh par mere ehsan honge

ghair ki shakl banenge kabhi KHud un ka shauq

hum bhi dekhen to kahan tak na wo pursan honge

dil jo ruTha to manane se kahin manta hai

ye sitam bais-e-hasrat tujhe ai jaan honge

aaj bahrup adu ka hai banaya main ne

ab to wo bhi mere andaz pe qurban honge

un ko pahnenge mere dasht-e-junun ke kanTe

ye wo daman hain ki aaKHir ko gareban honge

barhami duri-e-jaanan mein unhen hogi 'nasim'

mere nale asar-e-fikr-e-ghazal-KHwan honge