wasl manzur na ho gar to ijara kya hai

vasl manzūr na ho gar to ijārā kyā hai

dūsre dil pe bhalā zor hamārā kyā hai

rahzanoñ ko ye diyā raah meñ dhokā maiñ ne

māl-o-zar sab ye tumhārā hai hamārā kyā hai

vasl ik raat kā yā ḳhuun bahānā merā

tum ko in donoñ meñ ai jaan gavārā kyā hai

zahr kis tarah na khā.ūñ maiñ shab-e-furqat meñ

jaan dene ke sivā hijr meñ chārā kyā hai

miliye ġhairoñ se bahut ḳhuub na suniye kahnā

zak uThā.eñge huzūr aap hamārā kyā hai

TukḌe barchhī se karo yā hadaf-e-tīr karo

jigar-o-dil ye tumhāre haiñ hamārā kyā hai

jaan dene ko abas manā mujhe karte ho

is meñ nuqsān mirī jaan tumhārā kyā hai

aap par ham hoñ fidā aap hoñ ġhairoñ pe nisār

sach hai duniyā meñ kisī dil pe ijārā kyā hai

kyūñkar us shoḳh ko apnā maiñ karūñ ai 'fāḳhir'

tumhīñ batlāo kisī dil pe ijārā kyā hai

wasl manzur na ho gar to ijara kya hai

dusre dil pe bhala zor hamara kya hai

rahzanon ko ye diya rah mein dhoka main ne

mal-o-zar sab ye tumhaara hai hamara kya hai

wasl ek raat ka ya KHun bahana mera

tum ko in donon mein ai jaan gawara kya hai

zahr kis tarah na khaun main shab-e-furqat mein

jaan dene ke siwa hijr mein chaara kya hai

miliye ghairon se bahut KHub na suniye kahna

zak uThaenge huzur aap hamara kya hai

TukDe barchhi se karo ya hadaf-e-tir karo

jigar-o-dil ye tumhaare hain hamara kya hai

jaan dene ko abas mana mujhe karte ho

is mein nuqsan meri jaan tumhaara kya hai

aap par hum hon fida aap hon ghairon pe nisar

sach hai duniya mein kisi dil pe ijara kya hai

kyunkar us shoKH ko apna main karun ai 'faKHir'

tumhin batlao kisi dil pe ijara kya hai