wasl mein dil zafrani ho gaya

vasl meñ dil zāfrānī ho gayā

aise mahkā rāt-rānī ho gayā

ye jo dariyā hai fuġhāñ parbat kī hai

dard siine meñ thā paanī ho gayā

merī chāhat bhī sarāb-e-vasl hai

haañ ufuq maiñ terā saanī ho gayā

kuchh to pās-e-hijr rakhtā yaar vo

us kā tan to kahkashānī ho gayā

'ishq ne mujh se kinārā kar liyā

ai ḳhudā maiñ ġhair-fānī ho gayā

sirf us ne ik nazar dekhā mujhe

phir mirā sab kuchh kahānī ho gayā

ruuh ashkoñ se ghirī hai ziist ke

maiñ jazīre kī nishānī ho gayā

hai azal se bas ajal tak kā safar

sab asāsa be-ma’ānī ho gayā

wasl mein dil zafrani ho gaya

aise mahka raat-rani ho gaya

ye jo dariya hai fughan parbat ki hai

dard sine mein tha pani ho gaya

meri chahat bhi sarab-e-wasl hai

han ufuq main tera sani ho gaya

kuchh to pas-e-hijr rakhta yar wo

us ka tan to kahkashani ho gaya

'ishq ne mujh se kinara kar liya

ai KHuda main ghair-fani ho gaya

sirf us ne ek nazar dekha mujhe

phir mera sab kuchh kahani ho gaya

ruh ashkon se ghiri hai zist ke

main jazire ki nishani ho gaya

hai azal se bas ajal tak ka safar

sab asasa be-ma’ani ho gaya