wasl mein KHush kabhi dil hijr mein jalte dekha

vasl meñ ḳhush kabhī dil hijr meñ jalte dekhā

rang nairañg-e-jahāñ se ye badalte dekhā

uf re ai dard-e-judā.ī tire sadme shab-e-hijr

dil kī āñkhoñ se lahū ho ke nikalte dekhā

daaġh par daaġh uThā.e jo likhā thā vo huā

sach hai qismat ke navishta ko na Talte dekhā

kuchh to hai lutf-e-mohabbat meñ jo hote haiñ fanā

sham.a parvāna ko har bazm meñ jalte dekhā

dekh kar chaliye zamāne kā nasheb aur farāz

khā ke Thokar jo girā phir na sañbhalte dekhā

kaun hotā hai bure vaqt meñ ai yaar sharīk

ḳhaak par chhoḌ ke tan ruuh ko chalte dekhā

dāġh-e-tāza diye nairang-e-falak ne us ko

bāġh-e-ālam meñ jise phūlte phalte dekhā

vaqt kī qadr na kī lahv-o-la.ab meñ jis ne

umr bhar dast-e-ta.assuf use malte dekhā

ho mire sāmne kyā ḳhaak muqābil ko faroġh

khoTā sikka kahīñ bāzār meñ chalte dekhā

furqat-e-tālib-o-matlūb ġhazab hai 'raushan'

jaan ko jism se ruk ruk ke nikalte dekhā

wasl mein KHush kabhi dil hijr mein jalte dekha

rang nairang-e-jahan se ye badalte dekha

uf re ai dard-e-judai tere sadme shab-e-hijr

dil ki aankhon se lahu ho ke nikalte dekha

dagh par dagh uThae jo likha tha wo hua

sach hai qismat ke nawishta ko na Talte dekha

kuchh to hai lutf-e-mohabbat mein jo hote hain fana

shama parwana ko har bazm mein jalte dekha

dekh kar chaliye zamane ka nasheb aur faraaz

kha ke Thokar jo gira phir na sanbhalte dekha

kaun hota hai bure waqt mein ai yar sharik

KHak par chhoD ke tan ruh ko chalte dekha

dagh-e-taza diye nairang-e-falak ne us ko

bagh-e-alam mein jise phulte phalte dekha

waqt ki qadr na ki lahw-o-lab mein jis ne

umr bhar dast-e-tassuf use malte dekha

ho mere samne kya KHak muqabil ko farogh

khoTa sikka kahin bazar mein chalte dekha

furqat-e-talib-o-matlub ghazab hai 'raushan'

jaan ko jism se ruk ruk ke nikalte dekha