wasl mushkil hi sahi didar hona chahiye

vasl mushkil hī sahī dīdār honā chāhiye

kāñch kā ik rauzan-e-dīvār honā chāhiye

ho chukī had faisla ik baar honā chāhiye

ye tamāshā ab sar-e-bāzār honā chāhiye

zarf honā chāhiye me.aar honā chāhiye

aadmī ko sāhib-e-kirdār honā chāhiye

lutf manzil pe pahuñchne kā yaqīnan aa.egā

shart ye hai rāsta dushvār honā chāhiye

Dūbtī ho nabz lekin hosh kī bāteñ kare

aadmī ko is tarah bīmār honā chāhiye

bech kar īmān duniyā kī ḳharīdārī huī

shahr-bhar meñ aap kā satkār honā chāhiye

hai bahut āsān taqsīm-e-virāsat dosto

bhā.iyoñ meñ jazba-e-īsār honā chāhiye

kuchh ishāra bhī kināya bhī ho kuchh tamsīl bhī

kuchh ġhazal ke sher ko tahdār honā chāhiye

nāqidān-e-fan kā istiqbāl hai 'sājid' magar

nāqidoñ ko ġhair-jānib-dār honā chāhiye

wasl mushkil hi sahi didar hona chahiye

kanch ka ek rauzan-e-diwar hona chahiye

ho chuki had faisla ek bar hona chahiye

ye tamasha ab sar-e-bazar hona chahiye

zarf hona chahiye mear hona chahiye

aadmi ko sahib-e-kirdar hona chahiye

lutf manzil pe pahunchne ka yaqinan aaega

shart ye hai rasta dushwar hona chahiye

Dubti ho nabz lekin hosh ki baaten kare

aadmi ko is tarah bimar hona chahiye

bech kar iman duniya ki KHaridari hui

shahr-bhar mein aap ka satkar hona chahiye

hai bahut aasan taqsim-e-wirasat dosto

bhaiyon mein jazba-e-isar hona chahiye

kuchh ishaara bhi kinaya bhi ho kuchh tamsil bhi

kuchh ghazal ke sher ko tahdar hona chahiye

naqidan-e-fan ka istiqbaal hai 'sajid' magar

naqidon ko ghair-jaanib-dar hona chahiye