wasl us sitam-shiar ka dushwar bhi nahin

vasl us sitam-shi.ār kā dushvār bhī nahīñ

iqrār bhī nahīñ hai to inkār bhī nahīñ

māyūsiyoñ ne kī haiñ vo ḳhāna-ḳharābiyāñ

ab dil meñ shauq-e-lazzat-e-āzār bhī nahīñ

parde se mat sunāo mujhe lan-tarāniyāñ

mūsā-sifat haiñ tālib-e-dīdār bhī nahīñ

uzr-e-visāl kar ke mujhe zab.h kar diyā

kahte ho mere haath meñ talvār bhī nahīñ

ai sabr-e-rafta āshiq-e-nāshād al-madad

shab-hā-e-hijr meñ koī ġham-ḳhvār bhī nahīñ

māñgūñ duā-e-marg-e-adū aah kis tarah

lazzat-fazā-e-dil alam-e-yār bhī nahīñ

ahbāb dene jaate haiñ kandhā na jaate kyoñ

aisī to merī laash girāñ-bār bhī nahīñ

'akbar' ke sher sun ke jale jaate haiñ adū

kahte haiñ garm aap ke ash.ār bhī nahīñ

wasl us sitam-shiar ka dushwar bhi nahin

iqrar bhi nahin hai to inkar bhi nahin

mayusiyon ne ki hain wo KHana-KHarabiyan

ab dil mein shauq-e-lazzat-e-azar bhi nahin

parde se mat sunao mujhe lan-taraniyan

musa-sifat hain talib-e-didar bhi nahin

uzr-e-visal kar ke mujhe zabh kar diya

kahte ho mere hath mein talwar bhi nahin

ai sabr-e-rafta aashiq-e-nashad al-madad

shab-ha-e-hijr mein koi gham-KHwar bhi nahin

mangun dua-e-marg-e-adu aah kis tarah

lazzat-faza-e-dil alam-e-yar bhi nahin

ahbab dene jate hain kandha na jate kyon

aisi to meri lash giran-bar bhi nahin

'akbar' ke sher sun ke jale jate hain adu

kahte hain garm aap ke ashaar bhi nahin