wigha mein koi bhi aisa adu nahin aaya

viġhā meñ koī bhī aisā 'adū nahīñ aayā

hamārī teġh pe jis kā lahū nahīñ aayā

ye mat samajh ki mujhe jaañ 'azīz hai apnī

agar kabhī tah-e-ḳhanjar gulū nahīñ aayā

hamārī pursish-e-ahvāl ke liye aksar

tirā ḳhayāl to aayā hai tū nahīñ aayā

vo nā-tavāñ thā ki teġh-e-'adū ke chalne par

mire vujūd se bāhar lahū nahīñ aayā

maiñ aisā peḌ huuñ jis par bahār ho ki ḳhizāñ

kisī bhī daur meñ bār-e-numū nahīñ aayā

vo nā-umīd huā huuñ ḳhudā ke hote hue

mirī zabān pe lā-taqnatū nahīñ aayā

mahāz-e-‘ishq se nākām aa gayā lekin

ḳhudā kā shukr ki be-ābrū nahīñ aayā

kahīñ na phir se amāvas ne gher rakkhā ho

jo chāñd aaj sar-e-āb-jū nahīñ aayā

haañ vo tabīb to aayā thā neshtar ke liye

barā.e zahmat-e-kār-e-rafū nahīñ aayā

mujhe pata hai mohabbat hai kyā havas hai kyā

so us ko dekh to aayā huuñ chhū nahīñ aayā

vo 'aks mujh ko mukammal dikhā.ī de kaise

jo aa.ine meñ kabhī hū-bahū nahīñ aayā

wigha mein koi bhi aisa 'adu nahin aaya

hamari tegh pe jis ka lahu nahin aaya

ye mat samajh ki mujhe jaan 'aziz hai apni

agar kabhi tah-e-KHanjar gulu nahin aaya

hamari pursish-e-ahwal ke liye aksar

tera KHayal to aaya hai tu nahin aaya

wo na-tawan tha ki tegh-e-'adu ke chalne par

mere wujud se bahar lahu nahin aaya

main aisa peD hun jis par bahaar ho ki KHizan

kisi bhi daur mein bar-e-numu nahin aaya

wo na-umid hua hun KHuda ke hote hue

meri zaban pe la-taqnatu nahin aaya

mahaz-e-‘ishq se nakaam aa gaya lekin

KHuda ka shukr ki be-abru nahin aaya

kahin na phir se amawas ne gher rakkha ho

jo chand aaj sar-e-ab-ju nahin aaya

han wo tabib to aaya tha neshtar ke liye

barae zahmat-e-kar-e-rafu nahin aaya

mujhe pata hai mohabbat hai kya hawas hai kya

so us ko dekh to aaya hun chhu nahin aaya

wo 'aks mujh ko mukammal dikhai de kaise

jo aaine mein kabhi hu-bahu nahin aaya