viran ghar hai raunaq-e-bazar bhi nahin

vīrān ghar hai raunaq-e-bāzār bhī nahīñ

maiñ Tuut jā.ūñ is ke kuchh āsār bhī nahīñ

ai shaiḳh jab tū vāqif-e-kirdār bhī nahīñ

jā ehtirām-e-jubba-o-dastār bhī nahīñ

sūraj ne merī zid meñ shajar saare khā liye

mujh ko ḳhayāl-e-sāya-e-dīvār bhī nahīñ

ab kyā kahūñ ki kahne kā kuchh to javāz ho

jab vo nahīñ to lazzat-e-iz.hār bhī nahīñ

baḌhtī hī jā rahī hai mire dil kī kashmakash

vo bā-vafā hai aur vafādār bhī nahīñ

ustād ne ye kah ke ġhazal muñh pe maar dī

tarhī ġhazal hai aur tarah-dār bhī nahīñ

ab she'r haiñ to kuchh to hunar chāhiye miyāñ

haañ Thiik hai ye daftar-e-asrār bhī nahīñ

ḳhud ko miTā sako to mirī iqtidā karo

pās-e-anā bhī aur dar-e-yār bhī nahīñ

tū hī karam kare to mire harf hoñ du'ā

maulā mujhe salīqa-e-iz.hār bhī nahīñ

duniyā tujhe hai biknā jahāñ shauq se to bik

'vāhid-nazīr' terā ḳharīdār bhī nahīñ

viran ghar hai raunaq-e-bazar bhi nahin

main Tut jaun is ke kuchh aasar bhi nahin

ai shaiKH jab tu waqif-e-kirdar bhi nahin

ja ehtiram-e-jubba-o-dastar bhi nahin

suraj ne meri zid mein shajar sare kha liye

mujh ko KHayal-e-saya-e-diwar bhi nahin

ab kya kahun ki kahne ka kuchh to jawaz ho

jab wo nahin to lazzat-e-izhaar bhi nahin

baDhti hi ja rahi hai mere dil ki kashmakash

wo ba-wafa hai aur wafadar bhi nahin

ustad ne ye kah ke ghazal munh pe mar di

tarhi ghazal hai aur tarah-dar bhi nahin

ab she'r hain to kuchh to hunar chahiye miyan

han Thik hai ye daftar-e-asrar bhi nahin

KHud ko miTa sako to meri iqtida karo

pas-e-ana bhi aur dar-e-yar bhi nahin

tu hi karam kare to mere harf hon du'a

maula mujhe saliqa-e-izhaar bhi nahin

duniya tujhe hai bikna jahan shauq se to bik

'wahid-nazir' tera KHaridar bhi nahin