viran maqbaron se chalo mashwara karen

vīrān maqbaroñ se chalo mashvara kareñ

nām-o-nasab kā daur huā ḳhatm kyā kareñ

uḌtī hai ḳhaak kamroñ meñ aaseb kī tarah

dīvār-o-dar ko ġhaur se kab tak takā kareñ

hāthoñ meñ le ke camera bhaTkeñ tamām umr

maazī kī bikhrī yādoñ ko yakjā kiyā kareñ

ham sin-rasīda logoñ kī sohbat meñ baiTh kar

raushan zamīr vāloñ ke qisse sunā kareñ

aaya hai mere shahr meñ lekin milā nahīñ

vo kis jagah asiir hai chal kar patā kareñ

'jāved' terī ġhazloñ kā lahja hai muḳhtalif

dil ko tire mizāj se kyoñ āshnā kareñ

viran maqbaron se chalo mashwara karen

nam-o-nasab ka daur hua KHatm kya karen

uDti hai KHak kamron mein aaseb ki tarah

diwar-o-dar ko ghaur se kab tak taka karen

hathon mein le ke camera bhaTken tamam umr

mazi ki bikhri yaadon ko yakja kiya karen

hum sin-rasida logon ki sohbat mein baiTh kar

raushan zamir walon ke qisse suna karen

aaya hai mere shahr mein lekin mila nahin

wo kis jagah asir hai chal kar pata karen

'jawed' teri ghazlon ka lahja hai muKHtalif

dil ko tere mizaj se kyon aashna karen