virana-e-hasti mein jo kal rah-numa tha

vīrāna-e-hastī meñ jo kal rāh-numā thā

kyoñ aaj vo apnā hī patā pūchh rahā thā

murjhā ke bikhar jaanā hī taqdīr thī us kī

vo phuul sar-e-shāḳh-e-tamannā jo khilā thā

thā kūcha-e-dildār meñ ik sehr kā aalam

jo mujh ko nazar aaya vo apnā sā lagā thā

us ne hī mirī fikr ko baḳhshī hai harārat

ik aag kā dariyā jo kabhī paar kiyā thā

vo baat na kartā yahī behtar thā sar-e-bazm

is barf se lahje meñ to ik sho.ala chhupā thā

haiñ yaad ḳhad-o-ḳhāl na ab us kā sarāpā

vo jis kī hathelī pe mirā naam likhā thā

be-vaj.h koī ḳhud ko miTātā nahīñ 'sājid'

marnā hai agar kufr to jiinā bhī sazā thā

virana-e-hasti mein jo kal rah-numa tha

kyon aaj wo apna hi pata puchh raha tha

murjha ke bikhar jaana hi taqdir thi us ki

wo phul sar-e-shaKH-e-tamanna jo khila tha

tha kucha-e-dildar mein ek sehr ka aalam

jo mujh ko nazar aaya wo apna sa laga tha

us ne hi meri fikr ko baKHshi hai hararat

ek aag ka dariya jo kabhi par kiya tha

wo baat na karta yahi behtar tha sar-e-bazm

is barf se lahje mein to ek shoala chhupa tha

hain yaad KHad-o-KHal na ab us ka sarapa

wo jis ki hatheli pe mera nam likha tha

be-wajh koi KHud ko miTata nahin 'sajid'

marna hai agar kufr to jina bhi saza tha