virane ko ghar karte hain

vīrāne ko ghar karte haiñ

aisā ham aksar karte haiñ

ḳhvāboñ ke kuchh gul-būToñ se

sahrā ko ham ghar karte haiñ

ḳhud ko behtar karte karte

duniyā ko bad-tar karte haiñ

duniyā se laḌne kī ḳhātir

ḳhud ko ham ḳhanjar karte haiñ

ik muddat se jaane kyoñ ham

ghar ko bhī daftar karte haiñ

ghar meñ vo gar aa jaa.e to

ham andar bāhar karte haiñ

koī pūchhe hāl-e-dil to

āñkhoñ ko ham tar karte haiñ

virane ko ghar karte hain

aisa hum aksar karte hain

KHwabon ke kuchh gul-buTon se

sahra ko hum ghar karte hain

KHud ko behtar karte karte

duniya ko bad-tar karte hain

duniya se laDne ki KHatir

KHud ko hum KHanjar karte hain

ek muddat se jaane kyon hum

ghar ko bhi daftar karte hain

ghar mein wo gar aa jae to

hum andar bahar karte hain

koi puchhe haal-e-dil to

aankhon ko hum tar karte hain