viraniyan chunen hain ujaDe nahin gae

vīrāniyāñ chuneñ haiñ ujāḌe nahīñ ga.e

ham ḳhud bigaḌ ga.e haiñ bigāḌe nahīñ ga.e

duniyā ke kaam ham se jugāḌe nahīñ ga.e

puurī tarah se haath bhī jhāḌe nahīñ ga.e

ham le ga.e zamīñ sar-o-sāmāñ ke saath saath

hargiz jaḌoñ se apnī ukhāḌe nahīñ ga.e

kāġhaz mirī darāz meñ do qism ke mile

likkhe nahīñ ga.e haiñ ki phāḌe nahīñ ga.e

mausam tumhārī yaad ke sab mausamoñ meñ the

lambī thiiñ garmiyāñ kabhī jaaḌe nahīñ ga.e

jaane kab uTh khaḌe hoñ rivājoñ ke murda jism

phūñke nahīñ ga.e haiñ jo gaaḌe nahīñ ga.e

tanhā.iyoñ meñ 'zarra' taraste rahe magar

ham mahfiloñ meñ bhiiḌ ke aaḌe nahīñ ga.e

viraniyan chunen hain ujaDe nahin gae

hum KHud bigaD gae hain bigaDe nahin gae

duniya ke kaam hum se jugaDe nahin gae

puri tarah se hath bhi jhaDe nahin gae

hum le gae zamin sar-o-saman ke sath sath

hargiz jaDon se apni ukhaDe nahin gae

kaghaz meri daraaz mein do qism ke mile

likkhe nahin gae hain ki phaDe nahin gae

mausam tumhaari yaad ke sab mausamon mein the

lambi thin garmiyan kabhi jaDe nahin gae

jaane kab uTh khaDe hon riwajon ke murda jism

phunke nahin gae hain jo gaDe nahin gae

tanhaiyon mein 'zarra' taraste rahe magar

hum mahfilon mein bhiD ke aaDe nahin gae