wirasat mein mili thi jo wo daulat ja rahi hai

virāsat meñ milī thī jo vo daulat jā rahī hai

bahut din se kutub-ḳhāne ko dīmak khā rahī hai

nazar aa.ī hai sab ko aa.ine meñ apnī sūrat

sabhī ke naam par uñglī uThā.ī jā rahī hai

ye kaisā ajnabī lamha ta.āqub meñ hai apne

udāsī ghar ke andar paañv ab phailā rahī hai

numūd-e-sub.h hote hī ghar aa.ī koī bulbul

maze se naġhma-e-ulfat yahāñ par gā rahī hai

parakhtī hai nigāh-e-vaqt kis kis zāviye se

ye kaise mas.aloñ kī gutthiyāñ suljhā rahī hai

zamāne kī koī parvā kare āḳhir kahāñ tak

vo titlī hai use phūloñ kī sohbat bhā rahī hai

ye kaisī maslahat se log milte haiñ yahāñ par

ye kin jazbāt meñ chāhat simaTtī jā rahī hai

'azīm' is dā.ere se kis tarah bāhar maiñ niklūñ

ajab ḳhushbū sī zehn-o-dil pe mere chhā rahī hai

wirasat mein mili thi jo wo daulat ja rahi hai

bahut din se kutub-KHane ko dimak kha rahi hai

nazar aai hai sab ko aaine mein apni surat

sabhi ke nam par ungli uThai ja rahi hai

ye kaisa ajnabi lamha taaqub mein hai apne

udasi ghar ke andar panw ab phaila rahi hai

numud-e-subh hote hi ghar aai koi bulbul

maze se naghma-e-ulfat yahan par ga rahi hai

parakhti hai nigah-e-waqt kis kis zawiye se

ye kaise masalon ki gutthiyan suljha rahi hai

zamane ki koi parwa kare aaKHir kahan tak

wo titli hai use phulon ki sohbat bha rahi hai

ye kaisi maslahat se log milte hain yahan par

ye kin jazbaat mein chahat simaTti ja rahi hai

'azim' is daere se kis tarah bahar main niklun

ajab KHushbu si zehn-o-dil pe mere chha rahi hai