visal-e-yar kaise ho ye qissa kuchh ajab bhi hai

visāl-e-yār kaise ho ye qissa kuchh ajab bhī hai

charāġh-e-dil jale kab tak bahut lambī ye shab bhī hai

hameñ kuchh der ghar kī khiḌkiyāñ bhī band karne do

balā kā shor hai bāhar ḳhamoshī kī talab bhī hai

vahī pahchān hai apnī vahī hai apnī azmat bhī

kahīñ bhī pūchh lenā apnā koī nām-o-nasab bhī hai

ye āñkheñ diid kī tālib haiñ ab bhī bevafā man le

mulāqāteñ nahīñ hotīñ mirī jaañ kuchh sabab bhī hai

tumhāre naam ko sunte hī ḳhush hotā thā dil merā

tumhārā zikr aate hī in āñkhoñ meñ ġhazab bhī hai

mire bachche javāñ haiñ phir bhī sahmā sahmā rahtā huuñ

abhī bhī Dar hai vālid kā vahī dil meñ adab bhī hai

khanaktī chūḌiyoñ meñ hai chhalakte jaam kā partav

surūr-o-raqs kī rut hai aur ik jashn-e-talab bhī hai

'azīm' ab tak vahī yādeñ vahī hai miil kā patthar

guzargāhoñ kā har manzar jo pahle thā so ab bhī hai

visal-e-yar kaise ho ye qissa kuchh ajab bhi hai

charagh-e-dil jale kab tak bahut lambi ye shab bhi hai

hamein kuchh der ghar ki khiDkiyan bhi band karne do

bala ka shor hai bahar KHamoshi ki talab bhi hai

wahi pahchan hai apni wahi hai apni azmat bhi

kahin bhi puchh lena apna koi nam-o-nasab bhi hai

ye aankhen did ki talib hain ab bhi bewafa man le

mulaqaten nahin hotin meri jaan kuchh sabab bhi hai

tumhaare nam ko sunte hi KHush hota tha dil mera

tumhaara zikr aate hi in aankhon mein ghazab bhi hai

mere bachche jawan hain phir bhi sahma sahma rahta hun

abhi bhi Dar hai walid ka wahi dil mein adab bhi hai

khanakti chuDiyon mein hai chhalakte jam ka partaw

surur-o-raqs ki rut hai aur ek jashn-e-talab bhi hai

'azim' ab tak wahi yaaden wahi hai mil ka patthar

guzargahon ka har manzar jo pahle tha so ab bhi hai