visal-o-hijr ke dauraniye paDe hue hain

visāl-o-hijr ke daurāniye paḌe hue haiñ

kahīñ pe ḳhvāb kahīñ ratjage paḌe hue haiñ

lahū kā rang bhī taaza hai jā-ba-jā dekho

kahīñ pe baste kahīñ qā.ede paḌe hue haiñ

juḌā huā hai mire ghar se koī vīrāna

jahāñ pe duur talak vāqiye paḌe hue haiñ

tumhāre lams ne lazzat kā ras nichoḌā hai

abhī badan meñ ka.ī zā.iqe paḌe hue haiñ

maiñ ḳhud ko kaise sañbhālūñ jo karbalā pahuñchūñ

qadam qadam pe vahāñ sānehe paḌe hue haiñ

hameñ safar kā ishārā nahīñ huā varna

zamīñ pe rāste hī rāste paḌe hue haiñ

kisī kā aks kisī se badal na jaa.e kahīñ

ik aa.ine meñ ka.ī aa.ine paḌe hue haiñ

visal-o-hijr ke dauraniye paDe hue hain

kahin pe KHwab kahin ratjage paDe hue hain

lahu ka rang bhi taza hai ja-ba-ja dekho

kahin pe baste kahin qaede paDe hue hain

juDa hua hai mere ghar se koi virana

jahan pe dur talak waqiye paDe hue hain

tumhaare lams ne lazzat ka ras nichoDa hai

abhi badan mein kai zaiqe paDe hue hain

main KHud ko kaise sanbhaalun jo karbala pahunchun

qadam qadam pe wahan sanehe paDe hue hain

hamein safar ka ishaara nahin hua warna

zamin pe raste hi raste paDe hue hain

kisi ka aks kisi se badal na jae kahin

ek aaine mein kai aaine paDe hue hain