wo aa rahe hain wo ja rahe hain mere tasawwur pe chha rahe hain

vo aa rahe haiñ vo jā rahe haiñ mire tasavvur pe chhā rahe haiñ

kabhī haiñ dil meñ kabhī jigar meñ kabhī nazar meñ samā rahe haiñ

junūñ-navāzī hai merī fitrat isī se hāsil hai mujh ko rāhat

jo mujh se hosh-o-ḳhirad ne chhīnā junūñ ke sadqe vo pā rahe haiñ

jigar ko rokūñ yā dil ko thāmūñ ilāhī kis kis ko maiñ sambhālūñ

mire tasavvur kī anjuman meñ vo aaj ban-Than ke aa rahe haiñ

lagā.ī dil meñ kuchh aisī tū ne ye ātish-e-sozish-e-mohabbat

bhaḌak rahī hai ye utnā paiham ham us ko jitnā bujhā rahe haiñ

ye rāh-e-ulfat kī Thokareñ haiñ inheñ na manzil samajh ke Thahro

qadam baḌhāo vo qāfila hai tumhāre sāthī bulā rahe haiñ

haiñ rahravān-e-rah-e-mohabbat nirālī rasmeñ nirālī fitrat

jahāñ luTā kārvān-e-ulfat vahīñ pe manzil banā rahe haiñ

na ham ko sher-o-suḳhan se matlab na ishrat-e-anjuman se matlab

kisī ko 'iqbāl' dāstān-e-ġham-e-mohabbat sunā rahe haiñ

wo aa rahe hain wo ja rahe hain mere tasawwur pe chha rahe hain

kabhi hain dil mein kabhi jigar mein kabhi nazar mein sama rahe hain

junun-nawazi hai meri fitrat isi se hasil hai mujh ko rahat

jo mujh se hosh-o-KHirad ne chhina junun ke sadqe wo pa rahe hain

jigar ko rokun ya dil ko thamun ilahi kis kis ko main sambhaalun

mere tasawwur ki anjuman mein wo aaj ban-Than ke aa rahe hain

lagai dil mein kuchh aisi tu ne ye aatish-e-sozish-e-mohabbat

bhaDak rahi hai ye utna paiham hum us ko jitna bujha rahe hain

ye rah-e-ulfat ki Thokaren hain inhen na manzil samajh ke Thahro

qadam baDhao wo qafila hai tumhaare sathi bula rahe hain

hain rahrawan-e-rah-e-mohabbat nirali rasmen nirali fitrat

jahan luTa karwan-e-ulfat wahin pe manzil bana rahe hain

na hum ko sher-o-suKHan se matlab na ishrat-e-anjuman se matlab

kisi ko 'iqbaal' dastan-e-gham-e-mohabbat suna rahe hain