wo aaj mujhse jab mili to dhund chhaT gai

vo aaj mujh se jab milī to dhund chhaT ga.ī

magar na jaane kyā huā zamīñ hī phaT ga.ī

vo lamha ek chāñd thā mahaktī raat kā

vo chāñd bujh sakā na thā ki raat kaT ga.ī

bayāz-e-dard jab khulī to dil hañsā magar

guzishta ahd kī havā varaq ulaT ga.ī

hamārā aisā daur bhī rahā ki har galī

jidhar se ham guzar ga.e simaT simaT ga.ī

tamām ḳhushk jism sabz sabz ho gayā

vo ek pyāsī bel mujh se jab lipaT ga.ī

ḳhayāl us kā aayā to ḳhizāñ kī shaam kyā

kabhī kabhī to umr kī nadī palaT ga.ī

wo aaj mujh se jab mili to dhund chhaT gai

magar na jaane kya hua zamin hi phaT gai

wo lamha ek chand tha mahakti raat ka

wo chand bujh saka na tha ki raat kaT gai

bayaz-e-dard jab khuli to dil hansa magar

guzishta ahd ki hawa waraq ulaT gai

hamara aisa daur bhi raha ki har gali

jidhar se hum guzar gae simaT simaT gai

tamam KHushk jism sabz sabz ho gaya

wo ek pyasi bel mujh se jab lipaT gai

KHayal us ka aaya to KHizan ki sham kya

kabhi kabhi to umr ki nadi palaT gai