wo aalam tha ki KHatre se ulajh jaana zaruri tha

vo aalam thā ki ḳhatre se ulajh jaanā zarūrī thā

magar jī ko kisī sūrat to bahlānā zarūrī thā

hamārī be-zabānī varna ik āzār ban jaatī

ye vahshat hī sahī duniyā ko jatlānā zarūrī thā

nipaT kar dushmanoñ se dostoñ se bhī laḌā.ī kī

rahā ik dil to bechāre ko samjhānā zarūrī thā

badan miTTī kā Thahrā aur miTTī ek hotī hai

jahāñ bhī Tik ga.e miTTī se yārāna zarūrī thā

udāsī bām-o-dar kī dil meñ aise TuuT kar barsī

badan par mausamoñ kī naqsh lahrānā zarūrī thā

shamāla haath meñ lab par ġhazal aur raat bhīgī sī

mirā ḳhud apne hī raste se haT jaanā zarūrī thā

amīr-e-shahr to hiltā na thā apne Thikānoñ se

hameñ har haal meñ patthar se Takrānā zarūrī thā

bachā le aa.e apne aap ko ġhaul-e-shagālāñ se

jise kho aa.e the us shaḳhs ko paanā zarūrī thā

chale ho jānib-e-ka.aba jo yuuñ 'shāhīn' bā-vahshat

tumheñ pahle to ḳhud apne hī but Dhānā zarūrī thā

wo aalam tha ki KHatre se ulajh jaana zaruri tha

magar ji ko kisi surat to bahlana zaruri tha

hamari be-zabani warna ek aazar ban jati

ye wahshat hi sahi duniya ko jatlana zaruri tha

nipaT kar dushmanon se doston se bhi laDai ki

raha ek dil to bechaare ko samjhana zaruri tha

badan miTTi ka Thahra aur miTTi ek hoti hai

jahan bhi Tik gae miTTi se yarana zaruri tha

udasi baam-o-dar ki dil mein aise TuT kar barsi

badan par mausamon ki naqsh lahrana zaruri tha

shamala hath mein lab par ghazal aur raat bhigi si

mera KHud apne hi raste se haT jaana zaruri tha

amir-e-shahr to hilta na tha apne Thikanon se

hamein har haal mein patthar se Takrana zaruri tha

bacha le aae apne aap ko ghaul-e-shagalan se

jise kho aae the us shaKHs ko pana zaruri tha

chale ho jaanib-e-kaba jo yun 'shahin' ba-wahshat

tumhein pahle to KHud apne hi but Dhana zaruri tha