wo aarzu wo tamanna wo iztirab nahin

vo aarzū vo tamannā vo iztirāb nahīñ

maiñ ab vahāñ huuñ jahāñ koī bāryāb nahīñ

tirī nazar hai jise inqalāb kahte haiñ

tirī nazar ke sivā koī inqalāb nahīñ

tirī nigāh kī shauq-āfrīniyāñ tauba

jo kāmyāb hai vo bhī to kāmyāb nahīñ

ġham-e-firāq kī be-kaifiyāñ ḳhudā kī panāh

sharāb meñ bhī to kaifiyyat-e-sharāb nahīñ

mujhe pukār rahe haiñ sanam-kade vaale

mirī duā.eñ jo ka.abe meñ mustajāb nahīñ

sab inqalāb the un kī nigāh phirne tak

ab āsmān kī gardish meñ inqalāb nahīñ

jab iltifāt na thā ishtiyāq rahtā thā

ab iltifāt huā hai to dil ko taab nahīñ

vahīñ se uThte haiñ har inqalāb ke bādal

vo mai-kada ki jahāñ koī inqalāb nahīñ

mirī nazar ko na thī taab un ke jalvoñ kī

ab un ke jalvoñ ko merī nazar kī taab nahīñ

badal ga.e haiñ shab-o-roz-e-zindagī 'bismil'

vo māhtāb nahīñ ab vo āftāb nahīñ

wo aarzu wo tamanna wo iztirab nahin

main ab wahan hun jahan koi baryab nahin

teri nazar hai jise inqalab kahte hain

teri nazar ke siwa koi inqalab nahin

teri nigah ki shauq-afriniyan tauba

jo kaamyab hai wo bhi to kaamyab nahin

gham-e-firaq ki be-kaifiyan KHuda ki panah

sharab mein bhi to kaifiyyat-e-sharab nahin

mujhe pukar rahe hain sanam-kade wale

meri duaen jo kabe mein mustajab nahin

sab inqalab the un ki nigah phirne tak

ab aasman ki gardish mein inqalab nahin

jab iltifat na tha ishtiyaq rahta tha

ab iltifat hua hai to dil ko tab nahin

wahin se uThte hain har inqalab ke baadal

wo mai-kada ki jahan koi inqalab nahin

meri nazar ko na thi tab un ke jalwon ki

ab un ke jalwon ko meri nazar ki tab nahin

badal gae hain shab-o-roz-e-zindagi 'bismil'

wo mahtab nahin ab wo aaftab nahin