wo ada fareb-e-mahfil wo nazar bala-e-jaan hai

vo adā fareb-e-mahfil vo nazar balā-e-jāñ hai

mujhe kyā yaqīn aa.e ki vo mujh pe mehrbāñ hai

kabhī aañkh se hai dil tak kabhī dil se hai jigar tak

jo milī hai us nazar se vo ḳhalish kahāñ kahāñ hai

jo udhar hai be-qarārī vahī bekalī idhar hai

na sukūn-e-dil yahāñ hai na sukūn-e-dil vahāñ hai

tujhe be-ruḳhī mubārak mujhe ġham pe ġham diye jā

mirī himmateñ salāmat mirā hausla javāñ hai

mire hoñT siine vaale kabhī tū ne ye bhī sochā

vahāñ ḳhāmushī se hāsil jahāñ ḳhāmushī zabāñ hai

hue ik chaman meñ paidā magar apnī apnī qismat

koī ḳhaar ban ke khaTkā koī husn-e-gulsitāñ hai

koī 'bazm' ye na pūchhe ye mu'āmla hai dil kā

ki jahāñ qadam vo rakh de vo zamīñ bhī āsmāñ hai

wo ada fareb-e-mahfil wo nazar bala-e-jaan hai

mujhe kya yaqin aae ki wo mujh pe mehrban hai

kabhi aankh se hai dil tak kabhi dil se hai jigar tak

jo mili hai us nazar se wo KHalish kahan kahan hai

jo udhar hai be-qarari wahi bekali idhar hai

na sukun-e-dil yahan hai na sukun-e-dil wahan hai

tujhe be-ruKHi mubarak mujhe gham pe gham diye ja

meri himmaten salamat mera hausla jawan hai

mere honT sine wale kabhi tu ne ye bhi socha

wahan KHamushi se hasil jahan KHamushi zaban hai

hue ek chaman mein paida magar apni apni qismat

koi KHar ban ke khaTka koi husn-e-gulsitan hai

koi 'bazm' ye na puchhe ye mu'amla hai dil ka

ki jahan qadam wo rakh de wo zamin bhi aasman hai