wo apne zarb-e-lams se na-ashna nahin

vo apne zarb-e-lams se nā-āshnā nahīñ

kis ne kahā ki zaḳhm ye sabr-āzmā nahīñ

achchhā huā ki ham haiñ hisār-e-ḳhayāl meñ

apne vatan kā aur koī rāsta nahīñ

ā.īna saath rakh ke chalūñ poñchh kar jabīn

tasvīr ab bhī apnī koī dekhtā nahīñ

sahrā-e-hosh meñ bhī ka.ī baar gum hue

rahrav the rāhzan the kisī ko pata nahīñ

tārīkiyoñ ke saa.e bhī kitne muhīb haiñ

ham ko tulū-e-mehr kā koī gila nahīñ

gherā hai terī ruuh kī āvāz ne mujhe

huuñ dasht-e-ḳhāmushī meñ rahā hausla nahīñ

chingāriyāñ haiñ raushnī hai kārvān hai

ye vaqt jabki raat hai utnā burā nahīñ

sho.ala-ruḳhān-e-vaqt kī ātish-mizājiyāñ

rangīniyoñ kī ab bhī koī intihā nahīñ

yādoñ kī raushnī meñ tasavvur hai gāmzan

'nāzir' hamāre saath koī dūsrā nahīñ

wo apne zarb-e-lams se na-ashna nahin

kis ne kaha ki zaKHm ye sabr-azma nahin

achchha hua ki hum hain hisar-e-KHayal mein

apne watan ka aur koi rasta nahin

aaina sath rakh ke chalun ponchh kar jabin

taswir ab bhi apni koi dekhta nahin

sahra-e-hosh mein bhi kai bar gum hue

rahraw the rahzan the kisi ko pata nahin

tarikiyon ke sae bhi kitne muhib hain

hum ko tulu-e-mehr ka koi gila nahin

ghera hai teri ruh ki aawaz ne mujhe

hun dasht-e-KHamushi mein raha hausla nahin

chingariyan hain raushni hai karwan hai

ye waqt jabki raat hai utna bura nahin

shoala-ruKHan-e-waqt ki aatish-mizajiyan

ranginiyon ki ab bhi koi intiha nahin

yaadon ki raushni mein tasawwur hai gamzan

'nazir' hamare sath koi dusra nahin