wo apni zat ki tashhir se nikal aaya

vo apnī zaat kī tash.hīr se nikal aayā

zabāñ kā zahr thā taqrīr se nikal aayā

hatheliyoñ kī lakīroñ meñ thā jo poshīda

tumhāre haath kī tahrīr se nikal aayā

tumhārī yaad jo aa.ī to dil meñ huuk uThī

purānā zaḳhm na.e tiir se nikal aayā

tamām umr thī jis kī talāsh vo patthar

mire makān kī ta.amīr se nikal aayā

zarā sī der ḳhayāloñ meñ guftugū kī thī

phir is ke baad vo tasvīr se nikal aayā

shifā kā naam bhī zaitūn se huā mansūb

vafā kā shahad bhī injīr se nikal aayā

ik āftāb-e-vafā ek māhtāb-e-nūr

hamāre ishq kī tanvīr se nikal aayā

wo apni zat ki tashhir se nikal aaya

zaban ka zahr tha taqrir se nikal aaya

hatheliyon ki lakiron mein tha jo poshida

tumhaare hath ki tahrir se nikal aaya

tumhaari yaad jo aai to dil mein huk uThi

purana zaKHm nae tir se nikal aaya

tamam umr thi jis ki talash wo patthar

mere makan ki tamir se nikal aaya

zara si der KHayalon mein guftugu ki thi

phir is ke baad wo taswir se nikal aaya

shifa ka nam bhi zaitun se hua mansub

wafa ka shahad bhi injir se nikal aaya

ek aaftab-e-wafa ek mahtab-e-nur

hamare ishq ki tanwir se nikal aaya