wo aur hain jinhen ehsas-e-tirgi hai bahut

vo aur haiñ jinheñ ehsās-e-tīrgī hai bahut

yahāñ to TūTte lamhoñ kī raushnī hai bahut

hameñ bhī kar diyā shāmil unhīñ meñ logoñ ne

ki jin kī fikr-o-nazar meñ shikastagī hai bahut

kahāñ chale ga.e jāñ-dād-gān-e-shauq-o-vafā

hamāre hote hue bhī yahāñ kamī hai bahut

vo ik ḳhalish jo tirī yaad se qarīb bhī hai

tamām umr ko mere liye vahī hai bahut

zarā sī der hī mil kar bichhaḌne vāloñ ko

ḳhayāl-e-zāt hai kam pās-e-tishnagī hai bahut

tujhe ḳhabar bhī hai rātoñ ko jāgne vaale

mizāj merī bhī āñkhoñ kā shabnamī hai bahut

isī sabab se maiñ aksar udhar nahīñ jaatā

tumhāre baare meñ ik raah pūchhtī hai bahut

maiñ apne pairahan-e-tār-tār ke qurbāñ

ki sang-o-ḳhisht kī bārish meñ to yahī hai bahut

'rabāb' ḳhud ko hī fikr-o-nazar meñ rakhte hue

yahāñ se guzro ki har samt be-ruḳhī hai bahut

wo aur hain jinhen ehsas-e-tirgi hai bahut

yahan to TuTte lamhon ki raushni hai bahut

hamein bhi kar diya shamil unhin mein logon ne

ki jin ki fikr-o-nazar mein shikastagi hai bahut

kahan chale gae jaan-dad-gan-e-shauq-o-wafa

hamare hote hue bhi yahan kami hai bahut

wo ek KHalish jo teri yaad se qarib bhi hai

tamam umr ko mere liye wahi hai bahut

zara si der hi mil kar bichhaDne walon ko

KHayal-e-zat hai kam pas-e-tishnagi hai bahut

tujhe KHabar bhi hai raaton ko jagne wale

mizaj meri bhi aankhon ka shabnami hai bahut

isi sabab se main aksar udhar nahin jata

tumhaare bare mein ek rah puchhti hai bahut

main apne pairahan-e-tar-tar ke qurban

ki sang-o-KHisht ki barish mein to yahi hai bahut

'rabab' KHud ko hi fikr-o-nazar mein rakhte hue

yahan se guzro ki har samt be-ruKHi hai bahut