wo aur hain jinhen haalat sazgar mile

vo aur haiñ jinheñ hālāt sāzgār mile

hameñ to phuul kī chāhat meñ sirf ḳhaar mile

bahār-e-lāla-o-gul kā huuñ mustahiq maiñ bhī

mujhe bhī kaash kabhī mausam-e-bahār mile

ye sard aaheñ ye andoh-o-ġham ye bechainī

sile vafā ke mujhe kitne shāndār mile

badal vafā kā vafā hī milegā sochā thā

is aarzū meñ magar zaḳhm be-shumār mile

dayār-e-ġham meñ bhī maiñ muskurā ke jī lūñgā

agar jahāñ meñ koī mujh ko ġham-gusār mile

sunā sakā na kabhī dāstān-e-dil un ko

mile to dosh-e-havā par mujhe savār mile

ye kaise maan luuñ ḳhush haiñ vo apnī duniyā meñ

mujhe vo jab bhī mile haiñ to sogvār mile

wo aur hain jinhen haalat sazgar mile

hamein to phul ki chahat mein sirf KHar mile

bahaar-e-lala-o-gul ka hun mustahiq main bhi

mujhe bhi kash kabhi mausam-e-bahaar mile

ye sard aahen ye andoh-o-gham ye bechaini

sile wafa ke mujhe kitne shandar mile

badal wafa ka wafa hi milega socha tha

is aarzu mein magar zaKHm be-shumar mile

dayar-e-gham mein bhi main muskura ke ji lunga

agar jahan mein koi mujh ko gham-gusar mile

suna saka na kabhi dastan-e-dil un ko

mile to dosh-e-hawa par mujhe sawar mile

ye kaise man lun KHush hain wo apni duniya mein

mujhe wo jab bhi mile hain to sogwar mile