wo awwalin dard ki gawahi saji hui bazm-e-KHwab jaise

vo avvalīñ dard kī gavāhī sajī huī bazm-e-ḳhvāb jaise

vo chashm-e-surma kalām kartī vo saare chehre kitāb jaise

vo aañkh sāya-fagan hai dil par jo be-ḳhudī kā hai isti.āra

ghulī huī nīlgūñ samundar meñ tal.at-e-māhtāb jaise

bas ek dhamāka ki raat kī sarhadoñ kā kuchh to surāġh paa.eñ

bas ek chiñgārī chāhtā ho fatīla-e-āftāb jaise

vo jis kī pādāsh meñ sahar-zād apnī āñkheñ gañvā chuke haiñ

ik aur ta.abīr chāhte huuñ vo avvalīñ shab ke ḳhvāb jaise

vo mauj-e-sarkash jo sāhiloñ ko Dubo ga.ī kaise TūTtī hai

is ek manzar ke dekhne ko khulī ho chashm-e-habāb jaise

mirī mizha se Tapaktā aañsū ho jaise har Dūbtā sitāra

likhā gayā ho mirī hī palkoñ pe rat-jagoñ kā hisāb jaise

lahū jo rizq-e-zamīñ huā hai vo bārishoñ meñ dhulā nahīñ hai

tamām ā.inda mausamoñ ke ho naam ye intisāb jaise

wo awwalin dard ki gawahi saji hui bazm-e-KHwab jaise

wo chashm-e-surma kalam karti wo sare chehre kitab jaise

wo aankh saya-fagan hai dil par jo be-KHudi ka hai istiara

ghuli hui nilgun samundar mein talat-e-mahtab jaise

bas ek dhamaka ki raat ki sarhadon ka kuchh to suragh paen

bas ek chingari chahta ho fatila-e-aftab jaise

wo jis ki padash mein sahar-zad apni aankhen ganwa chuke hain

ek aur tabir chahte hun wo awwalin shab ke KHwab jaise

wo mauj-e-sarkash jo sahilon ko Dubo gai kaise TuTti hai

is ek manzar ke dekhne ko khuli ho chashm-e-habab jaise

meri mizha se Tapakta aansu ho jaise har Dubta sitara

likha gaya ho meri hi palkon pe rat-jagon ka hisab jaise

lahu jo rizq-e-zamin hua hai wo barishon mein dhula nahin hai

tamam aainda mausamon ke ho nam ye intisab jaise