wo baat nahin hai nahin wo baat nahin hai

vo baat nahīñ hai nahīñ vo baat nahīñ hai

tajdīd-e-mulāqāt mulāqāt nahīñ hai

jis bhaav bikā bech diyā manDī meñ ḳhud ko

ab is se ziyāda mirī auqāt nahīñ hai

ye baat agar sach hai yaqīñ kyoñ nahīñ aatā

suntā huuñ ki ab koī mire saath nahīñ hai

ab dil ko manāne meñ to ik umr lagegī

kahne ko to kahtā huuñ koī baat nahīñ hai

ham is ke sahāre ye sitam jhel rahe haiñ

ab ye na kaho is meñ tirā haat nahīñ hai

jis dil ne kabhī haar kī lazzat nahīñ dekhī

vo jāntā hai is se baḌī maat nahīñ hai

haañ zindagī meñ koī kamī to nahīñ lekin

is jiine meñ 'tāsīr' koī baat nahīñ hai

wo baat nahin hai nahin wo baat nahin hai

tajdid-e-mulaqat mulaqat nahin hai

jis bhaw bika bech diya manDi mein KHud ko

ab is se ziyaada meri auqat nahin hai

ye baat agar sach hai yaqin kyon nahin aata

sunta hun ki ab koi mere sath nahin hai

ab dil ko manane mein to ek umr lagegi

kahne ko to kahta hun koi baat nahin hai

hum is ke sahaare ye sitam jhel rahe hain

ab ye na kaho is mein tera hat nahin hai

jis dil ne kabhi haar ki lazzat nahin dekhi

wo jaanta hai is se baDi mat nahin hai

han zindagi mein koi kami to nahin lekin

is jine mein 'tasir' koi baat nahin hai