wo bahki nigahen kya kahiye wo mahki jawani kya kahiye

vo bahkī nigāheñ kyā kahiye vo mahkī javānī kyā kahiye

vo kaif meñ Duube lamhoñ kī ab raat suhānī kyā kahiye

uljhī huī zulfeñ ḳhvāb-asar badmast nigāheñ vaj.h-e-baqā

duniyā se magar imkān-e-shab-e-asrār-o-ma.ānī kyā kahiye

rūdād-e-mohabbat sun sun kar ḳhud husn ko bhī niiñd aane lagī

ab aur kahāñ se laa.eñ dil ab aur kahānī kyā kahiye

jiinā bhī bahut hī mushkil hai marnā bhī koī āsān nahīñ

allāh re kashākash ulfat kī kyā jī meñ hai Thānī kyā kahiye

'farhat' kā patā pūchhe jo koī kaafī hai faqat ye kaafī hai

phūTī huī qismat TuuTā dil ab aur nishānī kyā kahiye

wo bahki nigahen kya kahiye wo mahki jawani kya kahiye

wo kaif mein Dube lamhon ki ab raat suhani kya kahiye

uljhi hui zulfen KHwab-asar badmast nigahen wajh-e-baqa

duniya se magar imkan-e-shab-e-asrar-o-maani kya kahiye

rudad-e-mohabbat sun sun kar KHud husn ko bhi nind aane lagi

ab aur kahan se laen dil ab aur kahani kya kahiye

jina bhi bahut hi mushkil hai marna bhi koi aasan nahin

allah re kashakash ulfat ki kya ji mein hai Thani kya kahiye

'farhat' ka pata puchhe jo koi kafi hai faqat ye kafi hai

phuTi hui qismat TuTa dil ab aur nishani kya kahiye