wo bahte dariya ki be-karani se Dar raha tha

vo bahte dariyā kī be-karānī se Dar rahā thā

shadīd pyāsā thā aur paanī se Dar rahā thā

nazar nazar kī yaqīñ-pasandī pe ḳhush thī lekin

badan badan kī gumāñ-risānī se Dar rahā thā

sabhī ko niiñd aa chukī thī yuuñ to parī se mil kar

magar vo ik tifl jo kahānī se Dar rahā thā

larazte hoñToñ se gir paḌe the hurūf ik din

dil apne jazboñ kī tarjumānī se Dar rahā thā

luġhāt-e-jāñ se kashīd karte hue suḳhan ko

maiñ ek harf-e-ġhalat ma.ānī se Dar rahā thā

jamā huā ḳhuun hai ragoñ meñ na jaane kab se

rukā huā ḳhvāb hai ravānī se Dar rahā thā

vo be-nishāñ hai jise nishāñ kī havas thī 'āzar'

vo rā.egāñ hai jo rā.egānī se Dar rahā thā

wo bahte dariya ki be-karani se Dar raha tha

shadid pyasa tha aur pani se Dar raha tha

nazar nazar ki yaqin-pasandi pe KHush thi lekin

badan badan ki guman-risani se Dar raha tha

sabhi ko nind aa chuki thi yun to pari se mil kar

magar wo ek tifl jo kahani se Dar raha tha

larazte honTon se gir paDe the huruf ek din

dil apne jazbon ki tarjumani se Dar raha tha

lughat-e-jaan se kashid karte hue suKHan ko

main ek harf-e-ghalat maani se Dar raha tha

jama hua KHun hai ragon mein na jaane kab se

ruka hua KHwab hai rawani se Dar raha tha

wo be-nishan hai jise nishan ki hawas thi 'azar'

wo raegan hai jo raegani se Dar raha tha