wo barq-e-jalwa dikhae jamal agar apna

vo barq-e-jalva dikhā.e jamāl agar apnā

to ai kalīm kareñ ham nisār sar apnā

vo zāt-e-pāk kahāñ ye nigār-e-ḳhāk kahāñ

jo dekhe us ko zarā dekhe muñh bashar apnā

kahīñ ḳhizāñ hī banā vo kahīñ bahār banā

ġharaz har ek chaman meñ kiyā guzar apnā

basā hai merī hī āñkhoñ meñ kuchh nahīñ vo shoḳh

diloñ meñ sab ke banāyā hai us ne ghar apnā

harīm-ka.aba meñ but-ḳhāna meñ kalīsā meñ

banā.e qibla tumheñ sāhib-e-nazar apnā

maqām-e-ibrat-o-hasrat sarā-e-fānī hai

banā liyā hai jise ġhāfiloñ ne ghar apnā

guhar na samjho in ashkoñ ko haiñ ye la.al-e-saped

dikhā rahī hai ye e.ajāz chashm-e-tar apnā

samajh ke aib kareñge husūd mujh par taan

yahī hai soch dikhā.ūñ kise hunar apnā

fanā kī raah meñ vo garm-rau huuñ ai 'ājiz'

ki saaya bhī nahīñ vallāh ham-safar apnā

wo barq-e-jalwa dikhae jamal agar apna

to ai kalim karen hum nisar sar apna

wo zat-e-pak kahan ye nigar-e-KHak kahan

jo dekhe us ko zara dekhe munh bashar apna

kahin KHizan hi bana wo kahin bahaar bana

gharaz har ek chaman mein kiya guzar apna

basa hai meri hi aankhon mein kuchh nahin wo shoKH

dilon mein sab ke banaya hai us ne ghar apna

harim-kaba mein but-KHana mein kalisa mein

banae qibla tumhein sahib-e-nazar apna

maqam-e-ibrat-o-hasrat sara-e-fani hai

bana liya hai jise ghafilon ne ghar apna

guhar na samjho in ashkon ko hain ye lal-e-saped

dikha rahi hai ye eajaz chashm-e-tar apna

samajh ke aib karenge husud mujh par tan

yahi hai soch dikhaun kise hunar apna

fana ki rah mein wo garm-rau hun ai 'ajiz'

ki saya bhi nahin wallah ham-safar apna