wo barq ka ho ki maujon ke pech-o-tab ka rang

vo barq kā ho ki maujoñ ke pech-o-tāb kā rañg

judā hai sab se mire dil ke iztirāb kā rañg

shaguftagī mujhe zaḳhm-e-jigar kī yaad aa.ī

chaman meñ dekh ke khilte hue gulāb kā rañg

kiyā na tark agar tark-e-āshiqī kā ḳhayāl

ḳharāb aur bhī hogā dil-e-ḳharāb kā rañg

lagā rahe haiñ vo nashtar se zaḳhm par marham

nigāh-e-lutf-e-karam meñ bhī hai itaab kā rañg

ye mai-kada to hai ḳhud inqalāb kī duniyā

yahāñ jamegā na duniyā ke inqalāb kā rañg

havādasoñ se jamāl-e-ruḳh-e-hayāt hai yuuñ

qarīb shaam ho jis tarah āftāb kā rañg

dil-e-tabāh kā 'fāzil' ḳhudā hī hāfiz hai

ki ab hai aur hī kuchh dard-o-iztirāb kā rañg

wo barq ka ho ki maujon ke pech-o-tab ka rang

juda hai sab se mere dil ke iztirab ka rang

shaguftagi mujhe zaKHm-e-jigar ki yaad aai

chaman mein dekh ke khilte hue gulab ka rang

kiya na tark agar tark-e-ashiqi ka KHayal

KHarab aur bhi hoga dil-e-KHarab ka rang

laga rahe hain wo nashtar se zaKHm par marham

nigah-e-lutf-e-karam mein bhi hai itab ka rang

ye mai-kada to hai KHud inqalab ki duniya

yahan jamega na duniya ke inqalab ka rang

hawadason se jamal-e-ruKH-e-hayat hai yun

qarib sham ho jis tarah aaftab ka rang

dil-e-tabah ka 'fazil' KHuda hi hafiz hai

ki ab hai aur hi kuchh dard-o-iztirab ka rang