wo be-niyaz shab-o-roz-o-mah-o-sal gaya

vo be-niyāz shab-o-roz-o-māh-o-sāl gayā

ab us ke gum-shuda hone kā ehtimāl gayā

vo ik ḳhayāl ki har-dam jahāñ ḳhayāl gayā

kabhī azaab meñ rakkhā kabhī sambhāl gayā

jo shahr-e-lafz-o-ma.ānī se duur duur rahā

vo be-hunar tirī galiyoñ se bā-kamāl gayā

hudūd-e-vaqt se aage uḌaan bharte rahe

amīr-e-vaqt kā mansab gayā jalāl gayā

hameñ to rut ke badalne kī kuchh ḳhabar bhī nahīñ

ham apnī niiñd se jaage to har malāl gayā

asīr-e-shab vo rahā umr-bhar magar is baar

uThā to ḳhaak se sūraj ka.ī uchhāl gayā

na jaane kis ko vo āvāz detā rahtā hai

kabhī jo pūchhā to vo shaḳhs hañs ke Taal gayā

udaas udaas hai ab bhī 'sho.eb' fasl-e-murād

umiid umiid meñ lagtā hai phir ye saal gayā

wo be-niyaz shab-o-roz-o-mah-o-sal gaya

ab us ke gum-shuda hone ka ehtimal gaya

wo ek KHayal ki har-dam jahan KHayal gaya

kabhi azab mein rakkha kabhi sambhaal gaya

jo shahr-e-lafz-o-maani se dur dur raha

wo be-hunar teri galiyon se ba-kamal gaya

hudud-e-waqt se aage uDan bharte rahe

amir-e-waqt ka mansab gaya jalal gaya

hamein to rut ke badalne ki kuchh KHabar bhi nahin

hum apni nind se jage to har malal gaya

asir-e-shab wo raha umr-bhar magar is bar

uTha to KHak se suraj kai uchhaal gaya

na jaane kis ko wo aawaz deta rahta hai

kabhi jo puchha to wo shaKHs hans ke Tal gaya

udas udas hai ab bhi 'shoeb' fasl-e-murad

umid umid mein lagta hai phir ye sal gaya